UMUKINNYI W’UKWEZI kwa Gashyantare Iradukunda Eric Radu yashyikirijwe ibihembo
Ni umushinga w’Umuseke IT Ltd ugamije guteza imbere impano z’abakinnyi bo muri shampiyona y’u Rwanda
Myugariro wa AS Kigali Eric Iradukunda bita Radu watowe nk’umukinnyi wahize abandi muri Gashyantare muri Shampionat y’umupira w’amaguru mu Rwanda iterwa inkunga na AZAM, yashyikirijwe ibihembo bye n’Umuseke IT Ltd.
Kuri uyu wa kabiri tariki 28 Werurwe 2017 nibwo Iradukunda Eric w’imyaka 21 yashyikirijwe ibihembo by’umukinnyi witwaye neza kurusha abandi muri AZAM Rwanda Premier League.
Muri Gashyantare, Radu yatowe ku bwiganze bw’amajwi arushije bagenzi be bane bari bahanganye. Iradukunda Eric (AS Kigali) yagize 47%, akurikirwa na Niyonkuru Ramadhan (Musanze FC) wagize 22%, Kayumba Soteri (AS Kigali) agira 19%, naho Mico Justin (Police FC ) abona 12%.
Uyu myugariro mu mikino ine yakiniye AS Kigali muri Gashyantare yugariye neza kuko mu mikino ine yagendeweho binjijwe igitego kimwe gusa. Mu bitego bine bayitsinzemo, yagize uruhare mu bitego bitatu kuko yatsinze bibiri anatanga ‘assist’ imwe.
Yashyikirijwe ibihembo birimo ibahasha y’amafaranga ahabwa n’Umuseke IT Ltd ku bufatanye na La Galette, kompanyi ifite umwihariko mu bucuruzi bw’imigati n’ibikorwa mu ifarini na StarTimes yamuhaye HD Decoder irimo ifatabuguzi ry’amezi atanu.
Roben NGABO
UM– USEKE
English