Ikipe y’u Rwanda ya Rugby yahamagawe, 31 baritegura kujya muri Zambia

Umutoza mushya w’ikipe y’igihugu y’u Rwanda ya Rugby, Herbert Wafula yahamagaye abakinnyi 31 batangiye imyitozo bitegura irushanwa ‘African Rugby Cup 1C’, rizabera mu gihugu cya Zambia.

Nyuma y’icyumweru ahawe akazi ko gutoza ikipe y’igihugu y’u Rwanda ya Rugby ‘Silverbacks’, umunya-Uganda Herbert Wafula yatoranyije abakinnyi 31 muri 48 yari amaranye icyumweru mu myitozo.

Aba bakinnyi bari kwitegura irushanwa African Rugby Cup 1C, rizabera muri Zambia kuva tariki ya 24 Mata 2017, barasabwa gukora cyane kuko irushanwa bazitabira rikomeye kurusha ayo bitabiriye mbere.

Herbert Wafula yabwiye Umuseke ko afite ikizere cyo kwitwara agira ati: “Nagiriwe ikizere kandi ngomba kugaragaza ko abampaye akazi batibeshye. Natoranyije 31 bahagaze neza kurusha abandi mu Rwanda. Turifuza kugera kure muri African Rugby Cup. Biradusaba gukora cyane kuko tuzahura n’ibihugu bikomeye mu kiciro cyacu (1C). Gusa dushobora kugera ku ntego kuko mfite abakinnyi bafite ubushake.”

Uyu mutoza yakomeje avuga ko muri aba bakinnyi 31 azatoranyamo 22 azajyana i Lusaka muri Zambia. Bityo abo yahamagaye bagomba gukaza imyitozo bagahatanira umwanya.

Abakinnyi 31 bahamagawe:

Ngizwenayo Bernabe, Dushimimana Emmanuel, Niyoyita Peter, Ufitimfura Donatien, Nshimyimana Fabrice, Hakizimana Jean De Dieu, Mwiseneza Selaphin, Ndagijimana Milchior, Umurage Ebrahim, Gatemberezi Alexander, Imanishimwe Clement, Rukundakwiga Martin, Kazungu Patrick, Sibomana Christian, Makombe Benjamin, Twizeyimana Jean Leonard, Habimana Heritier, Umuhire Victorien, Ukwishaka Patrick, Nabimana Eric. Mugisha Michael, Isimbi Carlos, Bikamba Lucien, Mudaheranwa Claude, Niyoneza Gerard, Nsengimana Jean d’Amour, Kamali Vincent, Irumva Fidele Fils, Kabura Suleiman, na Iradukunda Ombeni.

Roben NGABO

UM– USEKE