Nshimiyimana nta gihindutse abona Rayon yamaze gutwara shampiyona

Umutoza wa AS Kigali Eric Nshimiyimana abona uyu mwaka ari umwaka wahiriye Rayon sports iyoboye urutonde kuko ngo nta gihindutse izegukana igikombe cya shampiyona uyu mwaka, ibintu atumvikanaho na Masudi Djuma utoza Rayon.

Nyuma yo gutsindwa na Rayon sports 1-0 mu mukino w’ikirarane w’umunsi wa 18 wa shampiyona y’u Rwanda ‘AZAM Rwanda Premier League’, umutoza Eric Nshimiyimana utoza AS Kigali yabwiye abanyamakuru ko abona andi makipe yatakaje ikizere cyo gutwara igikombe kuko amahirwe yose ari kuri Rayon sports.

Nshimiyimana yagize ati: “Gutsinda no gutwara igikombe bisaba byinshi birimo n’amahirwe kuko nk’uyu munsi Rayon Sports yabonye coup franc ivamo igitego ubundi tigerageza ibishoboka ariko tunanirwa kwishyura.

Mu rugamba rwo gushaka igikombe cya shampiyona iyo hatangiye kuzamo amanota icyenda navuga ko biba bigoye. Rayon Sports ifite amahirwe menshi naho twebwe tuzakomeza gukora cyane turebe umwanya mwiza tuzarangizaho. Keretse bo birangayeho nibwo twavuga ko twagaruka mu rugamba rwo gushaka igikombe.

Uyu mutoza ntiyemeranya na Masudi Djuma utoza Rayon sports kuko we abona hakiri kare bityo urugamba rwo guhatana abona rugifunguye ku makipe atatu cyangwa ane ya mbere.

Masudi Djuma yagize ati: “Ntago amanota umunani yatwara igikombe icyo ni icya mbere, icya kabiri buriya ugize kwiyizera birenze byica ibintu byinshi. Icya ngombwa ni uko twitegura buri mukino kuko ni ibirarane abandi baba barimo kutureba, abandi bose ntabwo barimo gukina iyo mikino ni mibi cyane.”

Ibi biravugwa habura imikino icyenda (9) ngo shampiyona y’u Rwanda igeze ku munsi wa 21 isozwe. Rayon sports iyiyoboye n’amanota 49 ifite n’umukino itarakina. Ikurikiwe na APR FC irushwa amanota umunani.

Amashusho ya AZAM TvRw agaragaza ibihe by’ingenzi by’umukino wa AS Kigali 0-1 Rayon sports

Roben NGABO

UM– USEKE