Kuva muri Muhanga nkajya muri Rayon ni nko kurira umusozi-Mutsinzi Ange

Myugariro w’ikipe y’igihugu Amavubi U20 Mutsinzi Ange Jimmy yabonye umwanya uhoraho muri Rayon sports mu mwaka wa mbere ayikiniye avuye muri AS Muhanga. Uyu musore abifata nko kurira umusozi muremure.

Rayon sports niyo kipe ifite ubwugarizi bukomeye kurusha izindi muri shampiyona y’u Rwanda igeze ku munsi wa 21, kuko imaze kwinjizwa 10 gusa. Ikurikiwe na AS Kigali yinjijwe ibitego 13.

Kuba yinjizwa bike ibifashwamo na ba myugariro bayo barimo Ange Mutsinzi Jimmy, umusore w’imyaka 19 watunguranye muri uyu mwaka. Kuko Rayon sports yamukuye muri AS Mugahanga yamanutse mu kiciro cya kabiri, ubu akaba afite umwanya uhoraho.

Uyu musore usanzwe ari umukinnyi w’ikipe y’igihugu y’abatarengeje imyaka 20 yabwiye Umuseke ko kwitwara neza kwe mu ikipe nshya abigereranya no kurira umusozi.

Mutsinzi yagize ati: “Kuva muri AS Muhanga nkajya muri Rayon sports byaranshimishije cyane. Gusa nkimara gusinya nagize ubwoba kuko nari ngiye gukinira ku gitutu bwa mbere mu buzima bwanjye. Gusa uko nabitekerezaga siko nabibonye kuko ntibyangoye kumenyera cyane kuko Rayon yari abakinnyi benshi bato harimo abo twakinanye.

Kubona umwanya uhoraho muri ba myugariro bakomeye Rayon ifite mbifata nko kurira umusozi kuko ari ikipe ikomeye cyane ngereranyije n’aho nakinaga umwaka ushize. Gusa ndashimira abatoza bangiriye ikizere kandi ndifuza gukomeza kwitanga kuko aka ni akazi kanjye.”

Yakomeje avuga ko myugariro yabonaga nk’ikitegererezo mu myaka ishize ari Abdul Rwatubyaye. Ubu barakinana muri Rayon sports. Kandi ngo Bokota Labama bakinanye muri AS Muhanga niwe rutahizamu ukomeye yahuye nawe.

Roben NGABO

UM– USEKE