Gustave Nkurunziza watorewe kuyobora ‘Fédération’ ya Volleyball yeguye

Nyuma y’iminsi 43 gusa Gustave Nkurunziza atorewe manda ya kabiri yo kuyobora ishyirahamwe ry’umukino wa Volleyball (FRVB), yeguye ku mirimo ye ku mpamvu ze bwite.

Uyu mugabo yatowe tariki 4 Gashyantare 2017 atsinze Léandre Karekezi bari bahanganye, ku majwi 18 ku majwi icyenda (9). Nyuma yo gutorwa, we n’umunyamabanga wa FRVB Hatumimana Christian batawe muri yombi na Polisi y’u Rwanda bashinjwa gukoresha ruswa mu matora.

Bamaze iminsi muri gereza nyuma bagirwa abere baranarekurwa. Aba bombi bamaze kwegura ku mirimo bari batorewe.

Umuyobozi w’inteko rusange ya FRVB, Mutwarasibo Philbert yabwiye Umuseke ko hagiye gutegurwa andi matora. Gusa muri iki gihe uwari umuyobozi wungirije muri iri shyirahamwe Kansiime Julius araba ayobora by’agateganyo.

Ibaruwa ya  Gustave Nkurunziza

Roben NGABO

UM– USEKE