Mugiraneza JB Migi ababajwe n’umusaruro wa APR FC ikipe akunda

Umukinnyi wo hagati w’Amavubi na Gor Mahia FC yo muri Kenya Mugiraneza Jean Baptiste Migi yagize icyo avuga kuri APR FC ikipe yakiniye, yabereye kapiteni kandi akunda. Yavuze ko yifatanyije n’abandi bakunzi ba APR FC mu gahinda.

Kuri iki cyumweru tariki 20 Werurwe 2017 APR FC yanganyije 1-1 na Pépinière FC iri ku mwanya wa nyuma ku rutonde rwa shampiyona y’u Rwanda ‘AZAM Rwanda Premier League’.

Uyu mukino wabaye umukino wa karindwi wikurikiranya APR ibonyemo intsinzi imwe. Yatsinze Mukura VS, itsindwa na Gicumbi FC, inganya na Bugesera FC, Amagaju FC, Musanze FC, Kirehe FC na Pépinière FC.

Kwitwara nabi ku ikipe ifite igikombe cya shampiyona giheruka byababaje cyane abakunzi ba APR FC bituma baririmba indirimbo zigaragaza ko batishimiye abatoza babo Jimmy Mulisa, Yves Rwasamanzi na Didier Bizimana.

Kapiteni wungirije w’ikipe y’igihugu Amavubi Jean Baptiste Mugiraneza Migi abinyujije ku rukuta rwe rwa Facebook yihaganishije abakunzi ba APR FC, yemeza ko nawe ari ikipe afite ku mutima. Iyi kipe yayikiniye kuva 2007 kugera tariki 22 Kamena 2015 ubwo yasinyaga muri AZAM FC yo muri Tanzania.

Roben NGABO

UM– USEKE