U Rwanda rutsinzwe na Uganda, rubura itike ya AFRO BASKET2017

Ikipe y’igihugu y’u Rwanda ya Basketball isezerewe muri ½ cy’irushanwa rihuza ibihugu byo mu karere ka gatanu. Itsinzwe na Uganda amanota 77-64. Bitumye u Rwanda rubura itike y’igikombe cya Afurika cya Basketball (AFRO Basket2017).

Ikipe y’igihugu ya Uganda ya Basketball bita Silverbacks yongeye kubabaza abanyarwanda muri Zone 5 iri kubera mu mujyi wa Cairo mu Misiri. Uganda yongeye gutsinda u Rwanda muri ½ cy’iri rushanwa ku nshuro ya kabiri yikurikiranya, 2015 na 2017.

Ikipe itozwana Moise Mutokambali yagowe no kwinjira mu mukino byatumye agace ka mbere karangira Uganda iyoboye n’amanota 24 kur 15. Agace ka kabiri abasore b’u Rwanda bayobowe na Kami Kabange biminjiriyemo agafu batsinda amanota 17 Uganda itsinze 13. Muri rusange agace karangiye Uganda ikiri imbere n’amanota 37-32.

Mu gace ka gatatu byakomeje kugora abasore b’u Rwanda rwatsinzwe amanota 55-49. Umukino wose usozwa Uganda itsinze amanota 77-64.

Kami Kabange niwe munyarwanda watsinze amanota menshi muri uyu mukino 18. Gasana Kenneth yatsinze amanota 17 naho Mugabe Aristide atsinda amanota 11.

Bivuga ko u Rwanda rubuze itike ya Afro Basket izabera i Brazzaville muri Rep Congo muri Nyakanga 2017.

Roben NGABO

UM– USEKE