Masudi witegura Onze Créateurs arasaba inkunga y’amasengesho

Rayon sports iritegura umukino wo kwoshyura wa CAF Condeferation Cup izahura na AS Onze Créateurs de Niaréla yo muri Mali. Umutoza Masudi Djuma yasabye abakunzi b’umupira w’amaguru gusengera Rayon sports kuko izahangana n’ikipe ikomeye.

Ku mugoroba wo kuri uyu wa kane tariki 16 Werurwe 2017 Rayon sports yakoreye imyitozo kuri stade Amahoro aho izakinira umukino wo kwishyura mu irushanwa rihuza amakipe yatwaye ibikombe iwayo muri Afurika ‘CAF Confederation Cup’.

Rayon sports izagerageza kwishyura igitego yatsindiwe i Bamako mu cyumweru gishize idafite bamwe mu bakinnyi bayo basanzwe barimo abasabanzwe ababanza mu kibuga nka; Fabrice Mugheni na Mutsinzi Ange Jimmy bahanwe kubera amakarita, Abouaba Sibomana na Evariste Mutuyimana barwaye.

Nyuma y’imyitozo umutoza Masudi Djuma yavuze ko biteguye kuko bamenye imikinire y’uwo bahanganye. Gusa ngo arasaba gusengerwa kuko si ikipe yoroshye.

“Twamenye uko bakina. Ni ikipe itubaka umukino cyane. Bakina imipira miremire. Naganiriye bihagije n’abakinnyi banjye bugarira kuko birabasaba guhangana cyane. Tugomba gusatira cyane kuko turimo umwenda w’igitego ariko tukanugarira neza kuko badutsinze igitego byaba bibaye ubusa.

Si ikipe yoroshye na gato. Tuzahangana kugera ku isengonda rya nyuma. Icyo nsaba abafana ba Rayon n’abakunzi b’umupira muri rusange ni ukudusengera imyiteguro igasozwa neza. Ariko bazaze no kudushyigikira ku mukino”

Umukino wa Rayon sports na AS Onze Créateurs de Niaréla uzayoborwa na Hassane Abdou wo muri Niger. Uzaba kuwa gatandatu tariki 18 Werurwe 2017, saa 15:30.

Roben NGABO

UM– USEKE