Cyubahiro yatsinze Amagaju FC araza AS Kigali ku mwanya wa gatatu

Roben Ngabo
03/11/2017

Cyubahiro Janvier wahesheje AS Kigali intsinzi

AS Kigali ikomeje kwitwara neza muri ‘AZAM Rwanda Premier League’. Kuri stade de Kigali yahatsindiye Amagaju FC 1-0, irara ku mwanya wa gatatu.

Kuri uyu wa gatandatu tariki 11 Werurwe 2017 hakomeje imikino y’umunsi wa 20 wa shampiyona y’u Rwanda ‘AZAM Rwanda Premier League. Umukino wabereye i Kigali, wahuje AS Kigali n’Amagaju FC y’i Nyamagabe.

Iminota 70 y’uyu mukino Amagaju FC yayikinnye ari abakinnyi icumi kuko Sibomana Arafat yahawe ikarita itukura ku munota wa 20’ nyuma y’ikosa yakoreye kuri Ndahinduka Michel hafi y’urubuga rw’amahina.

AS Kigali yagerageje gusatira no kubyaza umusaruro amahirwe yo gukina n’ikipe ifite abakinnyi batuzuye ariko mu gice cya mbere ntibashobora kubona igitego nubwo Cimanga Papi na Ndahinduka Michel bagiye bahusha uburyo bwabazwe.

Mu gice cya kabiri Eric Nshimiyimana yakoze impinduka azana abakinnyi badafite amazina amenyerewe gusa bahinduye umukino; Ndayisaba Hamidou yasimbuye Ntwali Evode, Toto Clement afata umwanya wa Mutijima Janvier, naho Uwimana Emmanuel asimbura Ntamuhanga Thumaine.

Amagaju FC atozwa na Pablo Nduwimana nayo yakoze impinduka zitandukanye; Manishimwe Jean de Dieu yatanze umwanya kuri Hakizimana Hussein, Ndizeye Innocent asimbura Shabani Hussein bita Tshabalala.

Izi mpinduka ntacyo zafashije Amagaju kuko ku munota 77 AS Kigali yabonye igitego rukumbi cyabonetse muri uyu mukino gitsinzwe na Cyubahiro Janvier.

Uyu mukino AS Kigali yatsinze wabaye uwa kane mu mikino itanu iheruka. Niyo kipe irusha izindi kwitwara neza muri shampiyona y’u Rwanda mu kwezi gushize. Byatumye ifata umwanya wa gatatu n’amanota 39 irushwa na APR FC inota rimwe kandi ifite umukino w’ikirarane.

Abakinnyi 11 babanjemo ku mpande zombi:

AS Kigali: Shamiru Bate, Iradukunda Eric Radu, Mutijima Janvier, Bishira Latif, Kayumba Soter, Murengezi Rodrigue, Ntwali Evode, Ntamuhanga Thumaine, Cimanga Papi, Ndahinduka Michel na Cyubahiro Janvier.

Amagaju FC: Muhawenayo Gadi, Sibomana Alafat, Buregeya Rodrigue, Bizimana Noel, Hussein Shabban Chabalala, Habimana Hassan, Arayenga Joacquim, Nsengiyumva Jafari, Manishimwe Obdie na Yumba Kayite.