Muri Gashyantare 2017 ibiciro ku masoko byarazamutse biteye impungenge

Raporo y’ikigo cy’igihugu cy’ibarurishamibare mu Rwanda (National Institute of Statistics/NISR) iragaragaza ko uyu mwaka wa 2017 utangiranye izamuka rikabije ry’ibiciro ku masoko nubwo byari byitezwe ko bizamanuka kubera umusaruro w’igihembwe cy’ihinga A cy’uyu mwaka wa 2017. Muri Gashyantare ibiciro ku masoko ku rwego rw’igihugu byazamutseho 13.4%.

Ni izamuka ridatangiranye na Gashyantare kuko no muri Mutarama 2017, ibiciro byari byazamutseho 12.0% ugereranyije n’uko ibiciro byari byifashe muri Mutarama 2016.

Iri zamuka ry’ibiciro rya 12.0% muri Mutarama 2017, na 13.4% muri Gashyantare 2017 ririhejuru cyane ugereranyije n’uburyo ibiciro byazamutse mu mwaka ushize wa 2016 igihugu cyagizemo amapfa.

Mu mwaka ushize ukwezi ibiciro byazamutsemo cyane ni Ukuboza 2016, aho ibiciro ku masoko byazamutse 11.0% ugereranyije n’uko byari byifashe mu ukuboza 2015. Gusa, muri rusange, kuva muri Kamena 2016 kugeza muri Gashyantare 2017 ibiciro byakomeje kuzamuka cyane.

Nk’uko bigaragazwa na Raporo ya NISR, mu cyaro niho ibiciro byatumbagiye cyane, kuko byazamutseho 16.2% ugereranyije na Gashyantare 2016, ndetse bizamukaho 2.3% ugereranyije n’uko ibiciro byari byifashe muri Mutarama 2017.

Naho mu mijyiho ibiciro muri Gashyantare 2017 byazamutseho 8.1% ugereranyije na Gashyantare 2016, gusa nanone bizamukaho 1.1% ugereranyije na Mutarama 2017.

Iri zamuka ry’ibiciro mu mijyi ryatewe ahanini n’izamuka ibiciro by’ibiribwa n’ibinyobwa bidasembuye byazamutseho 17.6%, ibiciro by’ubwikorezi n’ibiciro by’itumanaho byombi byazamutseho 8.3%, Ibiciro by’imyenda n’inkweto byazamutseho 7.5%, ibiciro by’inzoga n’itabi byazamutseho 6.5%, ibiciro by’amazi, icumbi, umuriro w’amashanyarazi, Gazi, n’ibindi bicanwa byazamutseho 2.1%, n’ibindi.

Iri zamuka ry’ibiciro ku masoko rya buri kwezi, nyamara imishahara n’ubundi buryo bwinjiriza abaturage amafaranga butazamuka, bikomatanyije no kuba agaciro k’amafaranga y’u Rwanda nako gakomeje kumanuka uyagereranyije n’amadolari, biri gutuma ubuzima bw’abatura Rwanda burushaho guhenda.

Tugendeye ku izamuka ry’ibiciro muri rusange, k’urugorwinjizaga umushahara w’ibihumbi 100 muri Gahysntare 2016, rukishyuramo inzu y’amafaranga ibihumbi 40, rugahahisha ibihumbi 50, andi ibihumbi 10 rukayakoresha mu ngendo n’itumanaho, umushahara winjiraga muri uru rugo ukaba utarazamutse, bivuze ko ubu rwa rugo rusabwa byibura andi mafaranga 10 470 rudafite, kugira ngo rubashe kubaho ubuzima nk’ubwo rwabagaho muri Gashyantare 2016.

Vénuste KAMANZI
UM– USEKE.RW