Senderi na Danny Vumbi bavanywe mu bazitabira Guma Guma

Senderi International Hit na Danny Vumbi bari mu kiciro cya Afrobeat ntibemerewe kwitabira irushanwa rya Primus Guma Guma Super Star7 kubera ko bari hejuru y’imyaka 35.

Nubwo hari abavuga ko aba bahanzi batari bakwiye kubuzwa amahirwe yo kwitabira iri rushanwa, Danny Vumbi avuga ko ari uburenganzira bw’abaritegura ariko hari ibyo birengagiza.

Avuga ko mu gihe irushwanwa rigifite izina rya ‘Super Star’ nta myaka runaka ituma ibikorwa bigira umuntu icyamamare biteshwa agaciro. Ahubwo akifuza ko ryazitwa irindi zina.

“Ku isi hose haba amarushanwa ahemba ibyamamare. Nta rushanwa na rimwe ndabona rihemba abana gusa nta muntu ukuze urimo. Ubwo rizahindurirwe izina ryitwe ‘Talent Detection’ aho kwitwa Super Star”– Danny Vumbi

Kuri Danny Vumbi bwari ubwa kabiri yajyaga kuba aryitabiriye. Naho Senderi byajyaga kuba bibaye ku nshuro ya kane arijyamo. Umwaka wa 2016 akaba atararyitabiriye kubera inshuro eshatu yari arigiyemo zikurikiranya.

Irushanwa rya Primus Guma Guma Super Star rigiye kuba ku nshuro ya karindwi niryo rushanwa rukumbi ribera mu Rwanda rigira uruhare runini mu guteza umuhanzi imbere.

Kuko usanga uryitabiriye wese aba afite umushahara ungana na miliyoni aba agomba guhembwa buri kwezi inyungu nini ikaboneka bitewe n’amezi rizamara rikorwa.

Ibisabwa ku muhanzi ugomba kwitabira iri rushanwa kuri iyi nshuro ya karindwi

1. Uhatana agomba kuba afite ubwenegihugu bw’u Rwanda
2. Agomba kuba afite imyaka iri hagati ya 18-35 y’amavuko
3. Abakobwa babiri bagomba kuboneka mu bahanzi icumi ba mbere
4. Agomba kuba atarigeze atwara iri rushanwa
5. Uwaryitabiriye inshuro eshatu ntiyemerewe guhatana mu mwaka wa 2017
6. Kuba yarakoze indirimbo eshatu hagati y’umwaka wa 2015-2017
7. Umuhanzi agomba kuba yarasohoye indirimbo ebyiri zifite amashusho kuva muri 2015-2017. By’umwihariko imwe muri izo video ikaba igaragara kuri YouTube.

Joel Rutaganda

UM– USEKE.RW