Minnaert witegura APR FC, yahagaritse bane barimo Emmanuel Ngama

Mukura Victory Sports et Loisirs Football Club irakira APR FC mu ku munsi wa 18 wa shampiyona y’u Rwanda. Iyi kipe y’i Huye irawukina idafite abakinnyi bane barimo abasanzwe babanza mu kibuga nka Ngama Emmanuel bahanwe bashinjwa imyitwarire mibi.

Kuri uyu wa gatanu tariki 24 Gashyantare 2017 harasubukurwa imikino ya shampiyona y’u Rwanda ‘AZAM Rwanda Premier League’ irimo itarabereye igihe ku makipe yahagarariye u Rwanda mu mikino ya CAF; APR FC na Rayon sports.

Iyi week-end irimo imikino ikomeye ibimburirwa n’uwo Mukura VS yakiramo APR FC kuri stade Huye. Umutoza mushya w’iyi kipe yo mu majyepfo, Yvan Jacky Minnaert yabwiye abanyamakuru ko mu kwitegura uyu mukino hari aba kinnyi bafite imyitwarire mibi yahagaritse, harimo na rutahizamu w’umurundi Ngama Emmanuel.

Yagize ati: “(Ndikumana Patrick, Rushami Valentin, Ngama Emmanuel, na Bukuru Christophe) Ni abantu badashaka gukurikira ibikorwa rusange by’ikipe. Nifuza gusa abakinnyi bari mu mwuka umwe n’abandi. Ntavuze byinshi, abadafite iyo myumvire mbashyira ku ruhande”

Aba basore bari gukora imyitozo muri Mukura VS y’ingimbi ntibagaragara muri uyu mukino. Bariyongera kuri Kwizera Tresor urwaye Malariya, Nshimiyimana Ibrahim uri mu mvune na Mwiseneza Daniel wujuje amakarita atatu y’umuhondo.

APR FC yatsinze imikino ibiri iheruka kuyihuza na Mukura VS, 2-1 na 3-1. Naho Mukura VS iheruka gutsinda APR FC mu mukino ubanza wa shampiyona y’umwaka ushize, 2-0 ku Umumena.

Mu mikino iheruka Mukura VS ihagaze neza kuko Yvan Minnaert kuva yafata ikipe ntaratsindwa. Yabonye amanota ane kuri atandatu. Naho APR FC  yo yagowe n’imikino ishize kuko  imaze imikino ine idatsinda.

Roben NGABO

UM– USEKE