Mbere yo kuza mu Rwanda Infantino yahuye n’abayobora football muri Afurika

Gianni Infantino uzaza mu Rwanda muri iyi week-end yahuye n’abayobozi b’amashyirahamwe y’umupira w’amaguru muri Afurika kuri uyu wa kabiri, biri kwiga ku mushinga wo kongera ibihugu bikina igikombe cy’isi.

Mu mujyi wa Johannesburg muri Afurika y’epfo niho hateraniye inama ya mbere ihuza ubuyobozi bwa FIFA buyobowe n’umutaliyani Gianni Infantino, n’abayobozi b’ibihugu byose bigize impuzamashyirahamwe y’umupira w’amaguru muri Afurika CAF.

Muri iyi ‘FIFA Executive Summit’ u Rwanda rwahagarariwe na perzida wa FERWAFA Nzamwita Vincent Degaule n’umunyamabanga we Uwamahoro Latifah.

Ni inama igamije kwiga no kunoza umushinga wo kongera ibihugu bikina igikombe cy’isi bikava kuri 32 bikaba 48 nkuko Gianni Infantino w’imyaka 46 yabitangarije BBC.

Nyuma y’iyi nama uyu muyobozi wa FIFA ubwenegihugu bw’Ubusuwisi azasura u Rwanda ashyire ibuye ry’ifatizo kuri hotel ya FERWAFA anitabire ibirori byo gufungura ku mugaragaro imirimo yo kubaka iyi hotel.

Uyu muhango uzakurikira umukino w’ikirarane wa shampiyona y’u Rwanda ‘AZAM Rwanda Premier League uzahuza Rayon sports na Police FC biteanyijwe ko nawo Infantino azareba.

Roben NGABO

UM– USEKE