Danny Usengimana yahembwe ariko ntiyafasha Police FC kubona intsinzi
Ushinzwe amasoko muri AZAM TV Sharifa K. Uwase, Mwezi Eric ushinzwe amasoko mu Umuseke, na Nizeyimana Felix wari uhagarariye nibo baha Danny Usengimana igihembo cya Mutarama
Nyamata – Umukinnyi w’ukwezi kwa Mutarama muri shampiyona y’u Rwanda Danny Usengimana yahawe igihembo ‘UM– USEKE Player of the month’. Ni mbere y’umukino ikipe ya Police FC yatsinzwemo na Bugesera FC kuri uyu wa kane.
Ku kibuga kiri mu mujyi wa Nyamata mu karere ka Bugesera habereye umwe mu mikino ine y’umunsi 17 wa shampiyona y’u Rwanda ‘AZAM Rwanda Premier League’ warangiye Bugesera FC itsinze Police FC 1-0.
Mbere yo gutangiza uyu mukino Umuseke IT Ltd ufatanyije na AZAM TV na FERWAFA bashyikirije Danny Usengimana igihembo cy’umukinnyi wahize abandi muri Mutarama mu mikino ya shampiyona.
Uyu musore w’imyaka 21 yatowe arushije Bertrand Iradukunda wa Bugesera FC na Imran Nshimiyimana na Aimable Nshimiyimana ba APR FC. Yabwiye Umuseke ko ashimira cyane bagenzi be bakinana.
Usengimana ati: “Iki ni igihembo gihabwa umuntu ku giti cye ariko njye ndagikesha ikipe yanjye kandi ndakibatuye. Iterambere ryose ngeraho nibo ndikesha mpereye ku batoza bacu n’abakinnyi bagenzi banjye.”
Nyuma y’iki gihembo Police FC y’umutoza Seninga Innocent yatsinzwe umukino wa shampiyona na Bugesera ya Mashami Vincent 1-0.
Igitego kitsinzwe na Nizeyimana Mirafa umukinnyi wo hagati wa Police FC ku munota wa 22 kuri coup franc yatewe na kapiteni wa Bugesera FC Nzabanita David Saibad.
Indi mikino y’umunsi wa 17 shampiyona yabaye none kuwa kane
Marines Fc 1-1 AS Kigali
Pepiniere Fc 0-1 Musanze Fc
Sunrise Fc 0-2 Kirehe Fc
Bugesera Fc 1-0 Police Fc
Kuwa gatanu
Etincelles Fc vs Mukura VS (Stade Umuganda)
Amagaju Fc vs SC Kiyovu (Nyamagabe)
Ibirarane
Tariki 28 Gashyantare 2017
APR Fc vs Gicumbi Fc (Stade de Kigali)
Tariki 1 Werurwe
Rayon Sports vs Espoir Fc (Stade de Kigali)
Photos © R.Ngabo/UM– USEKE
Videos © AZAM TV
Roben NGABO
UM– USEKE.RW
English