Abouba Sibomana mu bakinnyi 18 Rayon sports ijyana muri South Sudan

Rayon sports yakoze imyitozo ya nyuma mu Rwanda mbere yo kujya i Juba muri South Sudan ahateganyijwe umukino wa CAF Confederation Cup uzabahuza na Al Wau Salaam FC. Abouba Sibomana agiye gukina umukino wa mbere w’amarushanwa muri Rayon sports kuko ari muri 18 bazakoreshwa.

Kuri stade Amahoro niho Rayon sports yakoreye imyitozo ya nyuma ku mugoroba wo kuri uyu wa kane. Ni amasaha make mbere yo gufata indege ijya i Juba muri Sudani y’Epfo ahazabera umukino ubanza wa CAF Confederation Cup, umukino uteganyijwe kuwa gatandatu saa 16h zo mu Rwanda.

Imyitozo yakozwe n’abakinnyi 23 iyoborwa n’umutoza wayo Masudi Djuma irebwa n’abafana benshi barimo n’abayobozi bayo nka Gacinya Dennis uyobora ikipe na Kimenyi Vedaste uyobora umuryango wa Rayon sports.

Nyuma y’imyitozo y’amasaha abiri, abakinnyi ba Rayon sports baganiriye n’abafana babasaba kwitwara neza muri Sudani kuko byakongera amahirwe yo kugera mu matsinda y’iri rushanwa ritegurwa na CAF kuko ariyo ntego yabo.

Ndayishimiye Eric Bakame avugana n’itangazamakuru nyuma y’imyitozo yasabye abafana kubasengera kuko ari urugendo rutoroshye.

“Twiteguye neza. Ibyo twifuje ngo twitegure twarabihawe kandi abakinnyi bariteguye. Harimo abagiye gukina iyi mikino bwa mbere gusa abakuze nkanjye na Pierrot tugerageza kubaganiriza no kubumvisha uburemere bwayo. Nasaba abafana kudusengera kuko urugendo no gukinira hanze bitajya byoroha no kuzaza kutwakira kuko nizeye umusaruro mwiza”

Mu bakinnyi 18 batoranyijwe kuzahagararira Rayon sports muri Sudani harimo na Abouba Sibomana ugiye gukina umukino wa mbere w’amarushanwa kuva yasubira muri Rayon sports avuye muri Gor Mahia FC yo muri Kenya yari amazemo imyaka ibiri.

Abakinnyi 18 Rayon sports ijyana i Juba muri South Sudan ni:

Ndayishimiye Eric Bakame, Evariste Mutuyimana, Manzi Thierry, Gabriel Mugabo, Munezero Fiston, Mutsinzi Ange Jimmy, Irambona Eric, Abouba Sibomana, Jean d’Amour Mayor, Mugheni Fabrice, Kwizera Pierrot, Mugisha Francois Master, Nahimana Shasir, Manishimwe Djabel, Nova Bayama, Nshuti Dominique Savio, Lomami Frank na Moussa Camara

Staff:

Masudi Djuma (Umutoza), Nshimiyimana Maurice (Umutoza wungirije), Manirakiza Jean Claude Masope (Umutoza w’abanyezamu), Lomami Marcel (Fitness Coach), Mugemana Charles (Muganga), Jean Luc Imfurayacu (Umunyamakuru), na Gakwaya Olivier (Uyoboye ‘délégation’)

Roben NGABO

UM– USEKE