18 APR FC ijyana muri Zambia ntibarimo Innocent Habyarimana

Mu mpera z’iki cyumweru harakinwa imikino ya mbere y’amarushanwa ya CAF; Champions League na Confederation Cup. APR FC  izahagararira u Rwanda ihura na Zanaco FC yo muri Zambia, yamaze gutangaza 18 izakoresha mu mukino ubanza, batarimo Innocent Habyarimana uherutse gukora ubukwe.

Kuri uyu wa gatandatu tariki 11 Gashyantare 2017 nibwo APR FC izakina umukino wa mbere w’amajonjora y’ibanze ya TOTAL CAF Champions League. Iyi kipe y’ingabo z’u Rwanda iratangira ihangana na Zanaco FC yo muri Zambia.

Uyu mukino uzabera kuri stade Zanaco FC isanzwe yakiriraho ‘Sunset Stadium’ iri mu mujyi wa Lusaka, yakira abantu 5,100. Ukwitwara neza muri uyu mukino bizahesha APR FC kwizera itike y’ikiciro gikurikiraho kuko umukino wo kwishyura uzabera mu Rwanda tariki 18.

Jimmy Mulisa n’abamwungirije batoranyije abakinnyi 18 iza kujyana muri Zambia. Ntiharimo Innocent Habyarimana waguzwe avuye muri Police FC wakoze ubukwe mu mpera z’icyumweru gishize.

Umuvugizi wa APR FC Kazungu Claver yabwibwiye Umuseke ko ikora imyitozo ya nyuma kuri stade Amahoro kuri uyu wa gatatu saa 16h nyuma ifate indege ya saa 01h ijya i Lusaka muri Zambia

Abakinnyi 18 ba APR FC ni:

Emery Mvuyekure, Kimenyi Yves, Michel Rushangoga, Emmanuel Imanishimwe, Albert Ngabonziza, Herve Rugwiro, Usengimana Faustin, Nsabimana Aimable. Mukunzi Yannick, Nshimiyimana Amrani, Djihadi Bizimana , Benedata Benedata, Maxime Sekamana, Patrick Sibomana, Fiston Nkinzingabo. Twizerimana Onesme, Issa Bigirimana, na Nshuti Innocent.

Roben NGABO

UM– USEKE