Rayon idafite Shasir iraye ku isonga nyuma yo gutsinda Kiyovu 3-0

Nyamirambo- Shampiyona y’u Rwanda ‘AZAM Rwanda Premier League igeze ku munsi wa nyuma w’imikino ibanza. Umukino wabimburiye undi wahuje abakeeba ba kera, Rayon sports itsinda Kiyovu sports 3-0.

Kuri uyu wa gatanu tariki 27 Mutarama 2017 hakinwe umukino umwe w shampiyona. Kiyovu sports yasuye Rayon sports zombie zaratsinzwe imikino iheruka. Amateka yahaga amahirwe Rayon sports yaje muri uyu mukino idafite Nahimana Shasir ku bushake bw’umutoza wayo.

Umukino watangiye Kiyovu sports irusha Rayon sports cyane ku mipira miremire. Byatumye ku munota wa gatatu rutahizamu wayo Nizeyimana Jean Claude bita Rutsiro asigarana na Ndayishimiye Eric Bakame urindira Rayon sports ariko umupira awutera ku ruhande.

Nyuma y’iminota 10 nibwo abakinnyi bo hagati ba Rayon sports Kwezera Pierrot na Mugheni Fabrice batangiye kwigaragaza bikarinda bagenzi babo bugarira uyu munsi bakinaga ari batatu kuko Masudi yari yahisemo gukoresha abugarira batatu, abo hagati batanu na ba rutahizamu babiri.

Rayon sports yafunguye amazamu ku munota wa 16 igitego cy’umunya-Mali Moussa Camara ahawe umupira na Nshuti Dominique Savio. Uyu rutahizamu yahise yuzuza ibitego bitandatu mu gice cya mbere cya shampiyona.

Kanamugire Aloys utoza Kiyovu yahise asimbuza mu minota ya mbere, Nizeyimana Djuma afata umwanya wa Narcisse Ngabonziza gusa uyu musore uzwiho kwihuta ntiyahindura umukino kuko yagowe na Manzi Thierry wakinnye umukino wa mbere nyuma yo kuva mu mvune yagize mu Ugushyingo 2016. Igice cya mbere cyarangiye Rayon sports iyoboye n’igitego kimwe.

Kiyovu sports ya Kanamugire yakinnye neza mu minota 20 ibanza y’igice cya kabiri ariko ntibabyaza umusaruro uburyo butatu babonye bagera imbere y’izamu rya Rayon sports.

Ku munota wa 67 Masudi Djuma yakoze impinduka, Muhire Kevin wakinnye umukino wa mbere nyuma yo kubagirwa muri Maroc mu Ukuboza umwaka ushize yasimbuwe na Nsengiyumva Moustapha.

Byatanze umusaruro kuko nyuma y’iminota ine gusa Rayon sports yatsinze igitego cya kabiri cya Manishimwe Djabel. Ku mupira yari ahawe na Mugheni Fabrice.

Amakipe yombi yahise asimbuza; Niyitegeka Idrissa wa Kiyovu asimbura Blaise Bigirimana bita Matuidi naho Rwigema Yves afata umwanya wa Irambona Eric byatumye uburyo bw’imikinire buhinduka Nshuti Dominique Savio ajya gukina nka myugariro w’ibumoso.

Kiyovu sports yakinnye iminota 10 ya nyuma ari bake kuko Mukamba Namasobwa wakoze amakosa menshi muri uyu mukino yahawe ikarita itukura nyuma y’ikarita ya kabiri y’umuhondo yahawe ku ikosa yakoreye Savio.

Rayon sports ihana iri kosa Manishimwe Djabel yahaye Mugheni Fabrice atera ishoti hanze y’urubuga rw’amahina atsindira Rayon sports igitego cya mbere mu myaka ibiri ayimazemo, kiba icya gatatu muri uyu mukino.

Mutuyimana Djuma yasimbuwe na Karera ku ruhande rwa Kiyovu naho Camara asimburwa na Lomami Frank gusa ntacyo byahinduye ku mukino warangiye ari 3-0.

Byatumye Rayon sports irara ku mwanya wa mbere n’amanota 36 irusha APR FC izakina na Bugesera amanota atatu.

Abakinnyi babanje mu kibuga ku mpande zombi:

Rayon Sports: Ndayishimiye Eric Bakame, Manzi Thierry , Munezero Fiston, Eric Irambona, Mugheni Fabrice, Kwizera Pierrot, Nova Bayama, Nshuti Dominique Savio ,Muhire Kevin, Moussa Camara, Manishimwe Djabel

Kiyovu Sports: Hategekimana Bonheur, Mutuyumana Djuma, Ngarambe Ibrahim, Ngirimana Alexis, Mukamba Namasombwa, Twizeyimana Martin, Yamin Salum, Mustafa Francis, Narcisse Ngabonziza, Bigirimana Blaise, Nizeyimana Claude

Roben NGABO

UM– USEKE