Polisi y’u Rwanda yasubije Ambasaderi wa Uganda imodoka ebyiri na moto imwe

Ku gicamunsi cyo kuri uyu wa kabiri, Polisi y’u Rwanda yashyikirije Ambasaderi wa Uganda mu Rwanda Richard Kabonero imodoka ebyiri na moto imwe byari byaribwe bizanwa mu Rwanda.

Polisi y’u Rwanda ivuga ko izi modoka ebyiri zirimo iyo mu bwoko bwa V8 na Voiture ya Benz, na moto imwe byibwe mu i Burayi, mu Buyapani na Afurika y’Epfo maze ziza kwa mbarira ‘plaque’ muri Uganda.

Imodok y’i-voiture ya Benz yibwe muri 2015, maze iza gufatwa muri Gicurasi 2016.

Ibi binyabiziga byafashwe ku bufatanye bwa Polisi y’u Rwanda na Polisi mpuzamahanga ‘Interpol’.

ACP Karake Peter, ushinzwe Interpol mu Rwanda yavuze ko izi modoka zafatiwe ku mupaka zambuka mu Rwanda. Kugira ngo zifatwe, ngo hifashishijwe ikoranabuahnga rya Interpol.

Yagize ati “Ni udutsiko tutari muri Uganda gusa, ahubwo turi ku Isi yose. Haba mu Bwongereza, haba mu Buyapani, iyo urebye muri system ya Interpol harimo imodoka nyinshi zishakishwa zigera ku 300,000. Rero ni udutsiko dutandukanye tw’abantu bakora ibi byaha.”

ACP Karake Peter akagira inama abantu bagura imodoka zakoze kujya babanza bakabaza muri Interpol cyangwa kuri Polisi, bakamumenyesha niba nta kibazo ifite, kuko izo Serivisi bazitanga.

Amb. Richard Kabonero amaze gushyikirizwa biriya binyabiziga we yavuze ko bishimye cyane kuba ziriya moto n’imodoka zafashwe ku bufatanye hagati ya Polisi y’u Rwanda n’iya Uganda.

Avuga ko ubu nabo bagiye gucukumbura bamenye ngo ninde wandikishije ziriya modoka, ni hehe bazandikishirije kugira ngo zambare Plaque za Uganda, maze bamenye n’uwaziguze.

Commissioner of Police (CP) Emmanuel Butera we yavuze ko imikoranire hagati ya Polisi y’u Rwanda n’iya Uganda ubu imeze neza.

Yagize ati “Imikoranire imeze neza, niyo mpamvu n’ibi biba byafashwe, kandi byose tubikesha gahunda yo kwihutisha amakuru.”

CP Emmanuel Butera yavuze ko abazafatwa muri ibi bikorwa aho bari hose bazashyikirizwa ubutabera.

Mu mwaka ushize wa 2016, u Rwanda rwafashe imodoka zibiwe ahandi zikazanwa mu Rwanda zigera kuri 18. Gusa, ku rundi ruhande, mu mwaka ushize Uganda nayo yasubije u Rwanda imodoka enye.

Daddy S. Rubangura
UM– USEKE.RW