Abakobwa bajya muri video nti bakiri ikibazo- Tom Close

Muyombo Thomas ukoresha amazina ya Tom Close mu muziki, avuga ko agereranyije n’imyaka yatambutse, ubu kubona umukobwa ujya mu mashusho y’indirimbo bitakiri ikibazo nko muri 2008 kuko bisigaye ari akazi gahemba nk’akandi.

Avuga ko mbere wasangaga kubona umukobwa wemera kujya mu mashusho y’indirimbo yawe nk’umuhanzi byasabaga imbaraga zikomeye cyangwa se rimwe na rimwe bigatuma ukoresha uwo utateganyaga bitewe n’uburyo wifuzamo ko amashusho yawe azaza asa.

Ku miryango imwe n’imwe ikaba yaranabifataga nk’ubushizi bw’isoni ku mukobwa cyangwa se akitwa ikirara mu by’ukuri nta na hamwe bihuriye.

Tom Close yabwiye Umuseke ko yishimira intambwe yatewe n’abakobwa ubwabo bamaze gusobanukirwa neza ko kuba wagaragaza impano ikurimo ntaho bihuriye n’ubwomanzi nkuko byitwaga.

“Ubu kubona umukobwa ujya mu mashusho y’indirimbo yawe ntabwo bikiba ikibazo cyane!!Kuko bamaze gusobanukirwa neza ko ari akazi nk’akandi bitandukanye na mbere tugitangira umuziki”– Tom Close

Akomeza avuga ko amara impungenge umubyeyi wese waba ucyumva ko kuba
umwana we yakwitabira iki gikorwa nta rwicyekwe yakagombye kugira.

Mu gihe umwana w’umukobwa  yaba afite impano agomba guhabwa umwanya akayigaragaza nka musaza we. Aho kuba yashinjwa ingeso zindi zidafite aho zihuriye n’igikorwa arimo gukora.

Tom close yamaze gushyira no ahagaragara amashusho y’indirimbo ye yise ‘Ferrari’ ahamya ko iri mu ndirimbo ze zifite byinshi zishobora kumugezaho mu minsi iri imbere.

Nsanzimana Christopher

UM– USEKE.RW