Ukuboza 2016: Ibiciro ku masoko byiyongereyeho 11.0%

*Ibiciro by’ibiribwa n’ibinyobwa bidasembuye byiyongereyeho 20,9%
* Ibiciro by’ibijyanye n’ubwikorezi bizamukaho 4,9%.

Kuri uyu wakabiri, Ikigo cy’igihugu gishinzwe ibarurishamibare mu Rwanda cyatangaje raporo igaragaza igipimo cy’ihindagurika ry’ibiciro ku masoko mu kwezi kw’Ukuboza 2016. Raporo igaragaza ko ibiciro byazamutseho 11.0% muri rusange.

Raporo igaragaza ko ibiciro bikomatanyirijwe hamwe, mu mijyi no mu byaro mu kwezi kw’Ukuboza 2016 byiyongereyeho 11,0% ugereranyije n’ukwezi Ukuboza 2015. Iki gipimo mu kwezi kwabanje kw’Ugushyingo 2016 cyari cyagaragaje ko ibiciro byiyongereyeho 9.1%.

Ugereranyije ayo mezi abiri ya nyuma ya 2016, ibiciro byagabanutseho 0,2% mu Ukuboza 2016. Iri gabanuka ahanini ryatewe n’igabanuka ry’ibiciro by’ibiribwa n’ibinyobwa bidasembuye byagabanutseho 0,5%.

Bimwe mu byatumye ibiciro byiyongeraho 11,0% mu kwezi kw’Ukuboza 2016 nk’uko Ikigo cy’igihugu gishinzwe ibarurishamibare kibitangaza, ngo ni ibiciro by’ibiribwa n’ibinyobwa bidasembuye byazamutseho 20,9%, ibiciro by’amazu, amazi, amashanyarazi, Gazi n’ibindi bicanwa byazamutseho 1,2%, n’ibiciro by’ibijyanye n’ubwikorezi byazamutseho 4,9%, byose ugereranyije n’uko byari byifashe mu Ukuboza 2015.

Ibiciro mu mijyi byiyongereyeho 7,3%

Raporo y’ikigo cy’igihugu cy’ibarurirashamibare iragaragaza ko ibiciro mu mijyi byiyongereyeho 7,3% mu kwezi gushize kw’Ukuboza 2016, ukugereranyije n’Ukuboza 2015.

Bimwe mu byatumye ibiciro bizamukaho 7,3% mu mijyi, ngo ni ibiciro by’ibiribwa n’ibinyobwa bidasembuye byazamutseho 16,4%, ibiciro by’amazu, amazi, amashanyarazi, Gazi n’ibindi bicanwa byazamutseho 1,4% n’ibiciro by’ibijyanye n’ubwikorezi byazamutseho 7,7%.

Ugereranyije Ukuboza 2016 n’Ukuboza 2015, usanga ibiciro by’ibintu bitarimo ibiribwa n’ibikomoka ku ngufu byarazamutseho 5,3 %.

Wagereranya Ukuboza n’Ugushyingo 2016, ugasanga ibiciro byarazamutseho 0.3%. Iri zamuka rikaba ryaratewe n’ibiciro by’ibiribwa n’ibinyobwa bidasembuye byazamutseho 0,6%, n’ibiciro by’ibijyanye n’ubwikorezi byazamutseho 0,5% .

Ni mu gihe mu Ugushyingo 2016 ibiciro mu mijyi byari byiyongereyeho 6,4% ugereranyije Ugushyingo 2016 n’Ugushyingo 2015.

Ibiciro mu bice by’ibyaro byiyongereyeho 13,0%

Mu Ukuboza 2016, ibiciro mu byaro byiyongereyeho 13,0% ugereranyije n’Ukuboza 2015.

Nyamara, mu kwezi kw’Ugushyingo 2016, ibiciro byari byiyongereyeho 10,6% mu byaro.

Raporo ikavuga ko bimwe mu byatumye ibiciro bizamukaho 13,0% mu kwezi kw’Ukuboza ari ibiciro by’ibiribwa n’ibinyobwa bidasembuye byazamutseho 22,1%, n’ibiciro by’ibijyanye n’ibyambarwa n’inkweto byazamutseho 5,3%.

Hagati aho, ugereranyije ukwezi kw’Ukuboza n’ukw’Ugushyingo 2016, ibiciro mu byaro byagabanutseho 0,5%. Iri gabanuka ahanini ngo ryatewe n’igabanuka ry’ibiciro by’ibiribwa n’ibinyobwa bidasembuye byagabanutseho 0,8% n’ibiciro by’amazu, amazi, amashanyarazi, Gazi n’ibindi bicanwa byagabanutseho 0,8%.

Ikigo cy’igihugu gishinzwe ibarurishamibare gikora iyi raporo kigendeye ku biciro kiba cyakusanyije ku masoko yo hirya no hino mu gihugu.

UM– USEKE.RW