Collabo zidahagije n’abahanzi bakomeye ziri mu bituzitira kumenyakana muri Afurika- Dj Pius

Mu bihembo bitangwa ku banyamuziki bakomeye muri Afurika, nta banyarwanda bakunze kugaragaramo. Ibi ngo byaba biterwa no kutimenyekanisha ku bahanzi bakomeye basanzwe babyitabira kuko baba bazi neza inzira bicamo.

Dj Pius abona umuti wabyo ari ukongera imikoranire(collabo) n’abahanzi bakomeye bo hanze nk’inzira yo kubigeraho. Bitaba ibyo umuziki w’u Rwanda ukazakomeza kumva mu gihugu imbere aho kwagura imipaka.

Muri 2005 nibwo yatangiye kwiga ubu Djs nk’umunyamwuga. Maze aza no kuvumbura ko afite impano yo kuririmba ari nabwo muri 2012 yabitangiraga aba umu Dj n’umuhanzi atyo.

Kuva aho akoraniye indirimbo na Jose Chameleon bise ‘Agatako’ yanabaye indirimbo y’umunyarwanda ya mbere iciye ku matelevision akomeye muri Afurika, ngo gahunda afite ni uko agomba kuzazamura ibendera ry’u Rwanda ku rwego rwa Afurika mu umuziki.

Dj Pius wahoze mu itsinda rya Two 4 Real ryaje gusenyuka, abona  abahanzi nyarwanda bafite impano kandi bazi no kuririmba neza ariko bikaba bikigoranye kuba bahatanira kubona ibihembo bikomeye ku rwego rwa Afurika kubera ko batazwi.

Mukiganiro na Umuseke, yavuze ko abahanzi nyarwanda baramutse bafashe iya mbere bagashaka abahanzi bafite urwego bagezeho ku buryo hari icyo babigiraho byazatanga umusaruro mwiza.

Ati “Biragoye ko hanze bapfa gucuranga indirimbo yacu mu bitangazamaku byabo nta collabo y’umuhanzi wabo urimo. Kandi twe usanga ducuranga izabo. Ikindi ni uko gucurangwa kw’ibihangano byacu iwabo byatuma tuhamenyekana. Ariko bitoroshye ko byanaba”.

Kuri we ngo abona hari intambwe igenda iterwa n’abahanzi nyarwanda kandi ishimishije mu kwagura umuziki bakora kuko ari ibintu bigaragarira buri wese uzi aho umuziki w’u Rwanda wavuye n’aho ugeze.

Dj Pius unaherutse gukorana indirimbo n’itsinda rya GoodLyf bise ‘Play it Again’, ubu ari u bahanzi bahatanira ibihembo bya Hipipo Music Awards nk’umuhanzi w’umunyarwanda ufite indirimbo nziza y’umwaka.

Nsanzimana Christopher

UM– USEKE.RW