Dominic Nic agiye gushyira hanze album yise ‘The Victory’

Ni album ya gatatu agiye kumurika kuva yatangira gukora umuziki w’indirimbo zihimbaza Imana benshi bita ‘Gospel’ muri 2009. Ni n’umwe mu bahanzi bakora iyo njyana bafite album nyinshi hanze.

Dominic Nic usengera mu itorero rya ADEPER, yakunzwe cyane cyane mu indirimbo zitandukanye zirimo iyo yise ‘Ashimwe, Ndishimye, Ntihinduka n’izindi.

Indirimbo ye ya mbere yakozwe na producer Mastora muri studio ya Aphanet iherereye muri Repubulika iharanira demokarasi ya Congo. Nyuma nibwo yaje kuza mu Rwanda atangira uwo muziki by’ubunyamwuga.

Mu myiteguro arimo yo gushyira hanze iyo album, yabwiye Umuseke ko agiye gukora igitaramo kibanziriza icya album mu buryo bwo gusogongeza abantu indirimbo zizaba ziri kuri iyo album.

Ati ” Ndakangurira abantu bose kuzaza kwitabira iki gitaramo kugira ngo dukomeze kuzamura amashimwe yacu. Bizaba bishimishije igihe tuzaba dushimira Uwiteka ku bw’uburinzi bwe n’urukundo adakunda kuko turi ibiremwa bye. Icyo nizeye ni uko abazakitabira bazahabonera umugisha”.

Iyo album ye yise ‘Victory’ wagenekereza ikaba ari ‘Itsinzi’, akomeza avuga ko hari indirimbo ebyiri zindi azaririmba mu gitaramo abantu batari bumva. Izo akaba ari iyo yise Azanyibuka na Ndishimye’.

Biteganyijwe ko  tariki ya 11 Ukuboza 2016 kuri New Life Bible Church ku Kicukiro mu Kagarama ariho hazabera igitaramo asanzwe akora ngaruka mwaka cyo guteguza ikindi azamurikamo iyo album mu ntangiriro za 2017. Kwinjira bikazaba ari Ubuntu kuri buri wese uzahagera.

https://www.youtube.com/watch?v=KaqvthrUzN8

Nsanzimana Christopher

UM– USEKE.RW