Lil G agiye gushyira hanze album yise ‘Cyore’

Karangwa Lionel uzwi na benshi nka Lil G mu ruhando rwa muzika, agiye gushyira hanze album yise ‘Cyore’ izaba iriho indirimbo 12.

Iki ngo ni igisubizo ku bakunzi b’ibihangano bye kuko byagiye byibazwa kenshi kuba adashyira hanze album y’indirimbo ze kandi ari umwe mu bahanzi bamaze igihe mu muziki w’u Rwanda.

Lil G yamamaye cyane ubwo yakoranaga indirimbo na Meddy ubu uri muri Amerika bakayita ‘Nimba umugabo’. Nyuma yaje gukomeza gukora izindi bityo afatisha atyo.

Ni umwe mu bahanzi bamenyekanye cyane bakiri bato. Kuko ku myaka 14 yari amaze kujya mu mitwe ya benshi kubera ibihangano bye.

Bikunze kugaragara ku bahanzi batandukanye ko mu mpera z’Umwaka usanga bategurira abakunzi b’ibihangano byabo ibitaramo, abamurika za alubumu zabo, ndetse n’ibindi bituma bishimana n’abafana babo.

Ni muri urwo rwego Lil G nawe yamaze gutangaza ko album ye nshashya yise ‘Cyore’ azayimurikira abakunzi be ku itariki ya 29 Ukuboza 2016 kuri petit stade Amahoro i Remera.

Uyu muhanzi akomeza avuga ko azunganirwa n’abo bagiye bakorana indirimbo ziri kuri iyo album. Muri abo hakazaba harimo Young Grace n’undi muhanzi wo muri Uganda witwa AGANAGA ndetse n’abandi akivugisha.

Mu bindi bikorwa bya muzika, ni uko mu mpera z’uyu mwaka nyuma yo gushyira ku mugaragaro album ye, azahita asoza igikorwa yatangiye cyo kugenda azenguruka igihugu atoranya abana bafite impano badafite ubushobozi mu rwego rwo kubafasha kugaragaza impano zabo .

https://www.youtube.com/watch?v=Dtht9wyW21E

Nsanzimana Christopher

UM– USEKE.RW