Urubyiruko rufite impano rwongeye gushyirwa igorora

Benshi mu rubyiruko rufite impano bakunze kuvuga ko Babura ubushobozi kugira ngo bazigaragaze. Ku kigo cy’urubyiruko n’imyidagaduro kizwi nka ‘Maison de Jeunes’ giherereye Kimisagara hari kubera amarushanwa yiswe ‘Talent Zone’ agamije gufasha uru rubyiruko kugaragaza impano zabo.

Aya marushanwa yateguwe n’ikigo cy’Itangazamakuru cya Royal TV, rytabiriwe n’abana basaga 60 bavuga ko bafite impano ariko babuze uko bazigaragaza.

Aba basore n’inkumi bavuga ko bizeye kuzegukana aya mahirwe yo gufashwa gukorerwa indirimbo n’ibindi bihimbo birimo amafaranga.

Bavuga ko nibatsinda aya marushanwa bizatuma bazamuka kandi bagafasha kuzamura umuziki Nyarwanda ubu ukorwa n’abiganjemo urubyiruko.

Umwe muri bo yagize ati “kuba umu star bisaba amafaranga kugira ngo utange ruswa ku banyamakuru, aba DJ’s, promoters, n’abandi…”

Mu Rwanda hamenyerewe amarushanwa nk’aya aba agamije kuzamura impano z’abana b’Abanyarwanda ndetse bamwe mu bayatsinze bakagenda bavuga imyato ko hari intambwe babashije gutera babifashijwemo n’ibi bikorwa.

Innocent ISHIMWE
UM– USEKE.RW