Gicumbi: Uruhinja rugejeje igihe cyo kuvuka rwasanzwe mu musarani w’ikigo cy’ishuri

Mu ishuri ry’Imyaka Icyenda y’ibanze (Nine years basic Education) rya EPA Catholique riherereye mu murenge wa Byumba, mu karere ka Gicumbi, basanze umubiri w’uruhinja mu musarane w’iri shuri. Birakekwa ko uyu mwana wari ugejeje igihe cyo kuvuga yaba yajugunywemo n’uwari uturiye iki kigo cy’ishuri.

Abanyeshuri biga muri iri shuri rya EPA Catholique ni bo babonye uru ruhinja mu musarani kuri uyu wa Kane mu masaaha y’ikigoroba.

Umuyobozi w’Umurenge wa Byumba, Gahano Jean Mari Vianney yabwiye Umuseke ko ubuyobozi buri gukora iperereza kugira ngo bamenye niba hafi y’iri shuri hari umukobwa wari umaze iminsi atwite ku buryo ari we waba yaje kujugunya uyu muziranenge mu musarani.

Uyu muyobozi uvuga ko bashaka kumenya ko hari umukobwa cyangwa umugore waba yakuyemo inda muri aka gace, avuga ko uru ruhinja rwari rugejeje igihe cyo kuvuka.

Ati “ Amakuru twayamenye mu saaha ya nyuma ya saa sita, ikibanze twakoze tumaze kumusanga mu musarani twamukoreye isuku, dusanga ari Umwana w’umukobwa wari ugejeje amezi icyenda, nk’uko byagaragaraga yendaga Kuvuka.”

Uyu muyobozi uvuga ko bahise bashyingura uru ruhinja, yaboneyeho umwanya wo kugira inama abaturage, avuga ko niba umuntu yasamye atabiteganyije adakwiye kumva ko umwanzuro ugukuramo inda cyangwa kwambura ubuzima umwana kuko ari icyaha gihanirwa n’amategeko.

Mu masaaha ya mugitondo, ubwo twavugana na Gahano wirinze kuvuga byinshi ku iperereza riri gukorwa, avuga ko hari abagore/abakobwa bakekwaho iki gikorwa bamaze gufatwa bari bagiye kujyanwa ku bitaro kugira ngo bapimwe niba ntawakuyemo inda.

Uhagarariye Uburezi mu murenge wa Byumba wabereyemo iki gikorwa, avuga ko abanyeshuri bakimara kubona uru ruhinja, ikigo cyahise kibimenyesha ubuyobozi bw’inzego z’ibanze.

Asaba abarezi (abarimu n’abayobozi b’ibigo) kujya bakurikirana ubuzima bw’ishuri umunsi ku munsi, akanasaba abanyeshuri b’abakobwa kugendera kure inda zitateguwe.

Bamwe mu baturiye iki kigo cyasanzwemo uru ruhinja, bavuga ko uwakoze aya mahano atiga muri iri shuri kuko bagenzi be bari kuba baramutahuye dore ko bigaragara ko uru ruhinja rwari rugejeje igihe cyo kuvuka.

Evence Ngirabatware
UM– USEKE.RW/GICUMBI