Rally n’imyiyereko ya moto, ni ibirori bitazibagirana muri Huye
Nick de Wit yakoraga ibyo benshi babona nk’ibitangaza.
Abatuye Akarere ka Huye basusurukijwe n’isiganwa ry’imodoka “Memorial Gakwaya”, ryari riherekejwe n’imyiyereko y’abahanga mu gutwara moto.
Mu mpera z’iki cyumweru, kuwa gatandatu no ku cyumweru, abatuye mu mujyi wa Huye no mu nkengero zawo, babonye isiganwa ry’imodoka rigamije kwibuka igihangange mu mikino ya Rally, Claude Gakwaya.
Isiganwa ry’imodoka ryatangiye kuwa gatandatu, ryazengurukaga imirenge ya Huye itandukanye nka Ngoma, Tumba, bagana mw’i Rango, bagakomeza muri Gisagara, bagasore kuri Stade Huye binjiriye mu Rwasave.
Abasiganwa bahanyuze mu masaha ya ku manywa, gusa kuwa gatandatu tariki 15 Ukwakira 2016, habaye isiganwa ryo mw’ijoro ‘Night Stage’.
Ku cyumweru wari umunsi wo gusoza ibi birori bya Rally, yasorezwaga mu kibuga kiri iruhande rwa Stade Huye.
Abaturage abari benshi, basusurukijwe n’imyiyereko y’abatwara moto mu buryo butangaje baturutse muri Afurika y’Epfo, Nick de Wit na Scott Billet.
Abatsinze mu isiganwa ry’imodoka “Memorial Gakwaya” ntibaratangazwa, bazamenyekana kuri uyu wa kabiri. Gusa babiri ba mbere ni imodoka yari itwawe na Gakwaya Jean Claude wari kumwe na Mugabo Claude, ndetse na Mohamed Roshanali wari uri kumwe na Giesen Jean Jean.
Amafoto: Ishimwe Innocent
Roben NGABO
UM– USEKE.RW
English