Ngera/Nyaruguru: Batangiye kubaka amashuri asimbura ayubatswe mu 1964

Nyaruguru – Kuri uyu wa gatandatu mu muganda rusange ngaruka kwezi, mu Murenge wa Ngera abaturage bafatanyije n’abayobozi b’Akarere gucukura umusingi w’ahazubakwa ibyumba bibiri by’amashuri bizasimbura ibyari bishaje kandi biteye inkeke byubatswe mu 1964, ndetse baharura umuhanda wa Kilometero imwe.

Abaturage batuye mu mudugudu wa Nyanza ari naho ibi bikorwa byabereye, bishimiye ibikorwa byakozwe ku muhanda wabo.

Gusa by’akarusho bishimira ibyumba by’amashuri bagiye kubakirwa, abana babo bakajya bigiramo, bakava mu mashuri ashaje cyane yari amaze imyaka 52.

Abarezi bo kuri iri shuri ribanza rya Nyanza bavuze ko aya mashuri yari imbogamizi ikomeye ku myigire y’abana.

Agnes Mukamabano, umuyobozi w’ishuri ribanza rya Nyanza ati “Ibi byumba birashaje kuko yubatswe mu 1964, ubu ni ibyumba ubona ubu  byenda gutemba. Twari dufite imbogamizi dufite n’ubwoba kuko igihe cyose iyo imvura iguye dushakisha uburyo twakugamisha abana kuko birava.”

Naho uwitwa Jean Paul Habimana we avuga ko yari ibogamizi ikomeye ku ireme ry’uburezi, kuko ngo umwana atabashaga kwiga uko biteganyijwe.

Ati “Ku ireme ry’uburezi ni imbogamizi kuko abana bakunda gusiba mu mvura kuko ntibakwigira mu byondo, n’igihe iguye baje  kwiga birahagarara kuko tujya kubugamisha mu yandi mashuri.”

Abarimu, kimwe n’ababyeyi bavuga ko kubera gusaza cyane kw’ibi byumba by’amashuri, isuku iba ari ikibazo kubera kwigira mu mukungu ndetse rimwe na rimwe ngo hakabamo abarwara imvunja.

Umuyobozi w’Akarere ka Nyaruguru, Habitegeko Francois yijeje abaturage ko muri Mutarama 2017 ibi byumba by’amashuri bizaba byuzuye, ku buryo abana bazigira mu mashuri ameze neza.

Habitegeko kandi yanijeje abaturage bo muri aka gace ko nibamara gukemura ikibazo cy’ariya mashuri ashaje, ngo hazakurikiraho gukemura ikibazo cy’ubucucike kuko ngo hagiye kubakwa amashuri menshi, iri shuri rya Nyanza rikaba ishuri ry’ikitegererezo rifite amashuri y’incuke, abanza n’ayisumuye yo mu burezi bw’ibanze bw’imyaka 12.

Iri shuri ribanza rya Nyanza rifite ibyumba by’amashuri 8, abanyeshuri 765, abarimu 11 n’umuyobozi.

Callixte NDUWAYO
UM– USEKE.RW