Abantu nka 80 nibo bitabiriye Album Launch ya Jay Polly na Amag

Ku mugoroba wo kuri uyu wa gatanu tariki ya 26 Kanama 2016 muri petit stade i Remera Jay Polly na Amag The Black bamuritse album bise “Ubuzima bwanjye” yitabirwa n’abantu batarenze 80.

Icyo gitaramo cyari giteganyijwe ko gitangira saa kumi n’ebyiri z’umugoroba kubera ubuke bw’abantu bitabiriye cyatangiye saa tatu na mirongo ine (21h40’), abantu bari aho bibajije impamvu y’ubwo bwitabire buke kandi igitaramo cyaravuzwe.

Bamwe bashimangira ko HipHop itagikunzwe nka mbere cyangwa se ari uko abahanzi banyuze imbere y’abafana babo mu bitaramo bya Guma Guma kandi bakabarebera ubuntu.

Bitandukanye nuko kwinjira byari 2 000Frw mu myanya isanzwe na 5 000Frw muri VIP.

Muri abo bantu 80 bari muri petit stade, harimo n’abana binjiye basimbutse, abashinzwe isuku, n’abanyamakuru bageraga kuri 20 ugereranyije.

Jay Polly na Amag The Black baje kuririmbira abo bantu bombi aho kuba umwe yajyaga kuza akaririmba agaha undi umwanya nawe akaririmba indirimbo ze.

Baje kuri stage basaranganya indirimbo zabo buri wese afasha mugenzi we mu ndirimbo ze.

Baririmbye zisanzwe zizwi, harimo ‘Ubuzima bwanjye, Ziada, Go with me, Twarayarangije, n’izindi.

Byari biteganyijwe ko abahanzi batandukanye barimo,King James, Active, Urban Boys, Mani Martin, Yvan Buravani, bagombaga kuza muri iki gitaramo mu buryo bwo gushyigikira bagenzi babo.

Itsinda rya Active na Yvan Buravani bahage ku isaha bari babwiwe ko bagira kuri stage basanga abantu 10 nibo bari muri stade.

Bahitamo kugenda kubera ko batabwiwe niba hari impinduka zabaye muri icyo gitaramo.

Photos@Mugunga Evode/UM– USEKE

Joel Rutaganda
UM– USEKE.RW