Christopher yasezeye muri Kina Music

*Clement avuga ko ntacyo bapfuye

Nyuma y’ibiganiro hagati y’ubuyobozi bwa Kina Music na Christopher birebana n’ahazaza he muri Kina Music, impande zombi zumvikanye guhagarika amasezerano zari zifitanye, Christopher ava muri iyi nzu ya muzika gutyo ahita abitangaza kuri uyu wa mbere.

Aciye kuri Facebook,  Christopher yanditse amagambo ashimira Kina Music muri rusange ndetse na Clement wagize uruhare mu kumumenyekanisha.

Clement Ishimwe, umuyobozi akaba ari nawe washinze Kina Music yabwiye Umuseke ko nta kintu bapfuye n’uyu muhanzi wari umaze imyaka ine muri Kina Music.

Clement yemereye Umuseke ko habayeho ibiganiro hagati y’impande zombi bakumvikana ko Christopher agenda akikorera ku giti cye.

Clement ati “Nta mpamvu runaka navuga yatumye Kina Music ihagarika amasezerano na Christopher. Ni ubwumvikane bwabaye ku mpande zombi kuko amaze no gukura agomba kugira amahitamo.”

Mu ntangiriro za 2015 hacicikanye amakuru ko umwuka utari mwiza hagati ya Christopher na Clement ndetse bikaba byari byanatangajwe n’impande zombi ko bari mu biganiro byo kongera amasezerano.

Icyo igihe bikaba byaraje kujya ahagaragara ko bapfaga ijanisha (%) Christopher yagenerwaga na Kina Music ya Clement ritari rimushimishije.

Icyo gihe, mbere yo kugirana ibiganiro ku mpande zombi, amakuru akaba yaravugaga ko Christopher yafataga 30% y’ibyo yinjije muri Kina Music naho Clement agafata 70%.

Christopher niwe muhanzi wegukanye umwanya wa kabiri w’irushanwa rya Primus Guma Guma Super Star6 ryegukanywe na Urban Boys.

Umwanya wa kabiri ugenerwa igihembo cya miliyoni indwi n’igice (7.500.000 frw).

Uhereye kubyo yatangaje kuri Facebook, inyungu z’umuhanzi Christopher ntizigihagarariwe na Kina Music.

Ibyo Christopher yatangaje kuri Facebook:

Joel Rutaganda
UM– USEKE.RW