Christian witabiriye Tusker muri 2009 ngo umuziki w’u Rwanda ugeze aho utunga umuhanzi

Rwirangira Robert Christian umuhanzi witabiriye irushanwa rya Tusker Project Fame ubwo ryabaga ku nshuro ya gatatu, asanga ubu aho umuziki w’u Rwanda ugeze ushobora kugira icyo umarira uwukora bitandukanye na mbere.

Ni nyuma y’aho yerekereje i Dubai aho akurikirana ibijyanye na muzika, ubu akaba asigaye anakora ibijyanye n’imideli.

Christian wari kumwe na Alpha Rwirangira muri Kenya mu irushanwa rya Tusker Project Fame ryari ribaye bwa gatatu, yabwiye Umuseke ko umuziki wo mu myaka itanu ishize udahuye n’umuziki urimo gushyirwa hanze ubu.

Ibi bikaba ari nabyo birimo gutuma abahanzi bavuka igitaraganya kandi hakanazamuka abahanzi bafite impano zitari ugushakisha.

Ati “Mbere wasangaga umuziki twakoraga byaratugoraga cyane kuba wakora indirimbo ikazamenyekana ibyo twita kuba ‘Hit’. Ariko aho amaradiyo na television biziye ari byinshi nta muhanzi ukora indirimbo ngo ntiyumvwe”.

Kuba abahanzi b’ubu bafite amahirwe yo kumenyekanisha ibihangano byabo mu buryo buboroheye, ni kimwe mu bintu birimo gutuma hari abahanzi bamwe na bamwe batangiye gutungwa n’amafaranga bavana mu muziki.

Akomeza avuga ko uko u Rwanda rugenda rutera imbere mu bijyanye n’ubukungu, ari nako hagenda haza abashoramari benshi.

Bityo mu gihe kiri imbere umuziki ukaba ushobora kuzaba kimwe mu bice byinjiza amafaranga menshi ku bawukora ndetse bikazaba n’uburyo bwo kuwumenyekanisha hanze y’igihugu.

Christian niwe musore ugaragara mu mashusho y’indirimbo y’umuhanzikazi Butera Knowless yise ‘Reka nkukunde’ yakoreye i Dubai.

Abajijwe niba hari igitekerezo yaba afite cyo kuba yagaruka gutura mu Rwanda, yavuze ko nta kintu cyamubuza kugaruka narangiza ibyo arimo.

Joel Rutaganda

UM– USEKE.RW