Rwanda Inspiration Back Up ishobora kwamburwa isoko rya Miss Rwanda

Amakuru agera ku Umuseke, avuga ko Rwanda Inspiration Back Up yari isanganywe isoko ryo gutegura no gutora Nyampinga w’u Rwanda mu myaka itatu ishize, ishobora kwamburwa iryo soko kubera ingengo y’imari (Budget) yihagazeho.

Manda yo gutegura iki gikorwa yari yahawe Rwanda Inspiration Back Up yararangiye, Leta itanga isoko ku muntu wese wumva ashobora gupiganirwa gutegura icyo gikorwa cyo gutoranya MissRwanda.

Hari amakuru avuga ko mu gupiganira gutegura iri rushanwa ubu abahatana basigaye ari babiri; Rwanda Inspiration Back Up n’undi rwiyemezamirimo umwe.

Ubusanzwe iki gikorwa nta mafaranga Leta igishyiramo, ahubwo rwiyemezamirimo watsindiye isoko niwe ugishakira abaterankunga.

Aba ba rwiyemezamirimo bari gupigana mubyo batanze ngo harimo na Budget bazakoresha, amakuru agera k’Umuseke ngo ni uko Rwanda Inspiration Back Up ariyo yatanze igiciro kiri hejuru ugereranyije na Rwiyemezamirimo wundi bari gupigana.

Umuyobozi w’Umuco mu Nteko Nyarwanda y’Ururimi n’Umuco (RALC), Dr Nzabonimpa Jacques avuga ko isoko ryatanzwe na Leta atari Inteko Nyarwanda y’Ururimi n’Umuco (RALC) .

Ko bo nta n’ahantu bahurira no kumenya ugomba gutsindira isoko.

Avuga ko icyo bo bashinzwe ari ukumenya imyitwarire ya Nyampinga cyangwa se andi makuru ajyanye n’imitegurire yo gutora Nyampinga bitari isoko uburyo ritangwamo.

Kagame Ishimwe Dieudonne umuyobozi wa Rwanda Inspiration Back Up, avuga ko ayo makuru aribwo bwa mbere ayumvise. Gusa ko icyo bakoze ari uguhatanira isoko kimwe na buri rwiyemezamiro wese. Mu gihe basanga Rwanda Inspiration Back Up irikwiye yarisubizwa.

Kuva 2014,gutoranya Nyampinga w’u Rwanda cyagiye kigira impinduka buri mwaka, kugeza kuri Mutesi Jolly Nyampinga w’u Rwanda 2016 abaye umukobwa wa mbere uzitabira irushanwa ryo kuba Nyampinga w’isi ‘Miss Word’.

Ishimwe Kagame avuga ko Rwanda Inspiration Back Up yagahawe amahirwe yo kugumana gutegura iri rushanwa kuko ibifitemo ubunararibonye kandi hatagenderwa kuri budget kuko nta mafaranga Leta ibishyiramo ahubwo ashakwa n’abatsindiye isoko.

Joel Rutaganda
UM– USEKE.RW