Kaminuza ya Kibungo yongeye gutwara igikombe cya ‘Volley Ball’ muri EAC

Ku nshuro ya gatatu, mu myaka ikurikirana, Ikipe ya Kaminuza ya Kibungo, UNIK VC yongeye gutwara igikombe cy’irushanwa ‘NSSF-KAVS International’ rihuza amakipe ya Volley ball yo mu bihugu by’akarere ka Afurika y’Uburasirazuba, ryaberaga muri Uganda.

Iri rushanwa ryasojwe kuri iki cyumweru, Ikipe ya Kaminuza ya Kibungo, UNIK VC yanatwaye igikombe cya shampiyona ya Volley ball y’umwaka ushize mu Rwanda, itwaye iki gikombe inshuro eshatu yikurikiranya kuko kuva mu mwaka wa 2013 ari yo ikegukana.

UNIK VC itwaye igikombe cy’uyu mwaka nyuma yo gutsinda ikipe yitwa Sky yo mu gihugu cya Uganda cyaberagamo iri rushanwa, iyitsinze amaseti atatu kuri abiri.

Umutoza wa UNIK VC, Ntawangundi Dominic yavuze ko gutwara iki gikombe ari ishema kuri kaminuza ya Kibungo no ku Rwanda muri rusange kuko iyi kipe yari yagiye iserukiye igihugu cyose. Ati ” Twishimiye kuba dutwaye iki gikombe  ni ishema kuri twe no ku Banyarwanda muri rusange.”

Kapiteni w’iyi kipe, Ntagengwa Olivier yavuze ko UNIK VC ari ikipe ikomeye ndetse ko ifite ubushobozi bwo gutwara ibikombe nk’ibi, aboneraho gusaba ubuyobozi bwa Kaminuza ya Kibungo gukomeza kubashyigikira.

Ati ” Dufite ikipe ikomeye ishobora gutwara ibikombe bishoboka, iki tugitwaye gatatu twikurikiranya, na shampiyona ni uko, murumva ko dukomeye…”

Prof. Silas Lwakabamba uyobora iyi Kaminuza ya Kibungo avuga ko ubuyobozi bw’iri shuri bwishimiye kuba ikipe  yaryo itahanye intsinzi ndetse ko ari ikimenyetso cy’uko iyi kaminuza ikataje mu burezi no muri sport.

Ati ” Iyi kipe yatumye kaminuza yacu n’bAanyarwanda bishima kuko yakoze ibyo yagombaga gukora nk’ikipe ikomeye kandi dushyigikiye.”

Prof. Lwakabama avuga ko ubuyobozi bw’ishuri ayoboye buzakomeza gushyigikira iyi kipe kugira ngo igere ku rundi rwego rurenze urw’akarere.

UNIK VC ni nayo ifite n’igikombe cya shampiyona y’u Rwanda y’umwaka ushize ndetse ikaba ifite n’amahirwe menshi yo kuzegukana iy’uyu mwaka kuko imikino isigaye kuko n’iyo yayitsindwa imikino yose itava ku mwanya wa mbere.

Aya marushanwa yahuzaga amakipe  yabaye aya mbere mu bihugu byayo mu bihugu bigize Afurika y’Uburasirazuba, yitabiriwe n’amakipe atandukanye mu mukino wa Volley arimo ayo muri Tanzania, Kenya, Rwanda na Uganda yari yakiriye iri rushanwa mu gihe u Burundi butagize ikipe bwohereza.

Elia BYUK– USENGE
UM– USEKE.RW