Ahahoze Alpha Palace Hotel hagiye kujya Kaminuza

Amakuru Umuseke akesha bamwe mu bari gukora imirimo yo kuvugurura ahahoze hakorera Alpha Palace Hotel ku muhanda wa Kicukiro –  Remera – Giporoso aremeza ko iyi nyubako iri kuvugururwa ngo ikoreremo ishami ry’imwe muri Kaminuza zo muri Africa y’Epfo rishaga gutangira serivisi zayo mu Rwanda.

Aha, ngo hazajya hatangirwa amasomo y’ikiciro cya kabiri cya kaminuza (Masters’) cy’iri shuri.

Alpha Palace ni Hotel yari izwi cyane muri iki gice cy’Umujyi wa Kigali, mu gihe cyashize yacumbikiraga ikipe y’igihugu y’umupira w’amaguru Amavubi.

Aba bavuga ko aha ngo hazajya hatangirwa amasomo ya siyansi ndetse, ubuvuzi n’ibindi…

Mu gihe kitarenze amezi abiri imirimo yo gutunganya iyi nyubako ngo itangire kwakira amasomo izaba irangiye nk’uko umwe mu bubatsi utifuje gutangazwa amazina abyemeza.

Nyuma ngo ishuri rigiye gukorera muri iyi nyubako rishobora guhita ritangira imirimo ku mugaragaro rikanatangazwa.

Amakuru Umuseke ukesha abandi bakora kuri iyi nzu ni uko abagiye kuyikoreramo bayikodesheje igihe cy’imyaka itanu.

Jean Pierre NIZEYIMANA
UM– USEKE.RW