Nigeria: Igisirikare cyagaruye 5 000 bari bafashwe bugwate na Boko Haram

Igisirikare cya Nigeria kiratangaza ko kuri iki cyumweru cyagaruye abantu ibihumbi bitanu bari barafashwe bugwate na Boko Haram, ndetse kinahitana abarwanyi 10 b’uyu mutwe w’iterabwoba.

Mu itangazo ryasohowe n’umuvugizi w’igisirikare cya Nigeria, Col Sani Usman yavuze ko imirwano yo kugarura aba baturage yabereye mu duce dutandukanye turimo Zangebe, Maiwa, Algaiti na Mainari.

Col Sani avuga ko ibi bitero by’abasirikare b’igihugu, babigabye mu rwego rwo guhashya inyeshyamba za Boko Haram, byatumye abantu ibihumbi bitanu bari barafashwe bugwate na Boko Ham basubira mu ngo zabo.

Aba basirikare bagabye igitero muri utu duce twa Zangebe, Maiwa, Algaiti na Mainari bivuganye abarwanyi batandatu ba Boko Haram banafata ibinyabiziga byari byatwawe n’aba barwanyi.

Uyu muvugizi w’igisirikare cya Nigeria yavuze ko abasirikare ba Division ya 7, bafatanyije n’igipolisi bagabye ibindi bitero byo guhashya Boko Haram mu duce turimo Masu Yiwa, Ladin Buta, Bazaka, Kesa Gala, Tabla, Fahinde, Shirori, Gizina,…twose turi mu gace ka  Leta ya Borno.

Col Sani avuga ko muri iki gitero haguyemo abarwanyi babiri ba Boko Haram, umusivile umwe wari uri mu butumwa bw’amahoro arahagwa.

Uyu muvugisi w’igisirikare cya Nigeria yavuze ko abandi basirikare bagize bataillon ya 192 bagabye ikindi gitero ahitwa Kusarha-Zalidava.

Muri iki gitero cyo, ngo haguyemo abarwanyi babiri ba Boko Haram, ndetse igisirikare gifata imbunda nini yo mu bwoko bwa GPMG.

UM– USEKE.RW