Mu bo duhanganye nta wambuza gutwara Guma Guma- Christopher

Ku nshuro ye ya gatatu yitabira irushanwa rya Primus Guma Guma Super Star, Christopher ngo mu bahanzi ari kumwe nabo nta n’umwe abona umuteye igihunga cyo kuba yananirwa kwegukana iri rushanwa.

Avuga ko nubwo nabo bari mu irushanwa kandi bashaka kwegukana icyo gikombe cy’umwanya wa mbere, nta n’umwe abona afitiye ubwoba.

Christopher yabwiye Umuseke ko kuba atarabashije kugaragara mu irushanwa rya Primus Guma Guma Super Star5 yegukanywe na Knwoless, byamuhaye umwanya wo gukora ani nabyo yerekwa n’abafana mu bitaramo amaze gukora.

Mu bitaramo bitatu bimaze kuba by’iri rushanwa, Christopher ari mu bahanzi bamaze kwerekana ko bafite amahirwe yo kuba yakwegukana iri rushanwa bitewe n’umubare w’abafana aba afite.

Ibyo byose ngo abikesha zimwe mu ndirimbo arimo kuririmba bwa mbere imbere y’abaturage kuva yazishyira hanze. Izo ndirimbo ni ‘Abasitari, Ndabyemeye, Babyumva’ n’izindi.

Ati “Ndi kumwe n’abandi bahanzi mu irushanwa. Ariko nta n’umwe ubu navuga ko mfitiye ubwoba kuko nta wurabuntera. kuba ntaraje muri Guma Guma ishize byatumye nkora indirimbo ntuje ari nazo zirimo ku nkorera akazi ubu”.

Akomeza avuga ko mu nshuro amaze kwitabira iri rushanwa yagiye aba ahanganye n’abahanzi bamwerekaga ko bashobora kuba bamurusha ingufu. Ariko bitandukanye n’ubu.

Abajijwe ku mazina arimo kugaruka mu bitangazamakuru cyane ko yaba afite amahirwe yo kwegukana iri rushanwa nayo arimo Urban Boys na Jules Sentore, yavuze ko ntacyo abatekerezaho.

Ko ibyo areba ari ugukora neza ku byo asabwa n’abagize akanama nkemurampaka ndetse n’ibyo we asabwa nk’umuhanzi. Ikindi akitwara neza imbere y’abafana.

Joel Rutaganda

UM– USEKE.RW