Prof. Nkusi ati “ishyamba si ryeru ku itutumba rya ‘Genocide’ mu karere”

Kuva kuri uyu wa 13 Kamena, I Kigali hateraniye inama irebera hamwe uruhare rw’ubuyobozi mu gukumira jenoside, Sen. Prof Laurent Nkusi avuga ko mu bihugu bigize akarere k’ibiyaga bigari hari ahagaragara ibicyezicyezi bya Jenoside kuko hari bamwe banyapolitiki bakoresha imvugo zigira abo zambura ubumuntu nk’izakoreshejwe n’abo muri Leta yateguye ikanashyira mu bikorwa Jenoside yakorewe Abatutsi.

Sen. Nkusi uvuga ko kwambura abantu ubumuntu babagereranya n’inyamaswa n’utundi dusimba byakorwaga mbere ya Jenoside n’Abanyapolitiki babinyujije mu mbwirwaruhame zabo no mu nyandiko zagiye zandikwa na bamwe mu bategetsi bo muri za Guverinoma zari ziriho.

Senateri Nkusi avuga ko imvugo nk’izi nta kindi ziba zigamije uretse kumvisha abo mu bundi bwoko ko aba atari abantu bityo n’igihe cyo gushyira mu bikorwa umugambi wo kubarimbura bizitabirwa.

Ati “…iyo umaze kwambura abo bantu ubumuntu bwabo biroroshye kuko uwo ubwira ni yo yica wa muntu yumva yica ya nyamaswa,…uretse ko no kwica inyamaswa hari uburyo bayica’.”

Senateri Nkusi, avuga ko imvugo nk’izi ubu ziriho zinakoreshwa na bamwe mu bayobozi bo mu bihugu bitandukanye biri mu karere k’ibiyaga bigari nka Uganda, Tanzania na RDC aho zikunze gukoreshwa n’abanyapolitiki bifuza ubutegetsi..

Sen Nkusi avuga ko aba banyapolitiki bakunze kwikingira ikibaba kugira ngo iyi migambi mibisha baba bategura idatahurwa cyangwa igikundiro n’ikizere baba bifuza bikagabanuka.

Ati “Hari ukubwira ati n’ubwo hari ibibazo ariko mu by’ukuri nta jenoside ihari, undi ati abantu bavuze ko muri Darfour hazaba Jenoside ariko ntitubona ko yabaye,…ukibaza uti ese ni politicide (ubwicanyi buturuka ku mvururu za politiki), ese ni ubuhe bwicanyi, ukibaza uti igihari ni iki?”

Prof. Nkusi avuga ko ibi bigaragaza ko Jenoside iba itutumba bityo ko inzego zo kuyirwanya ziba zikwiye guhaguruka. Ati “…Muri aka karere, ntawavuga ko ishyamba ari ryeru.”

Uyu musenateri avuga ko umukoro uhari uri ukwibaza isano y’ibi biri kuba mu karere n’ibyabaye mu Rwanda. Ati “Duhore twibaza tuti ejo cyangwa ejobundi, ikintu cy’ingengabitekerezo ya Jenoside niba yarahereye mu Rwanda, yagiye ibiba amashami hirya no hino.”

Nkusi yanagarutse ku magambo mabi akoreshwa n’amwe mu mashyaka aba amaranira ubutegetsi muri aka karere, yavuze ko mu gihugu cy’u Burundi hari imbwirwaruhame zuzuyemo urwango ziriho zikoreshwa na bamwe mu bayobozi na bamwe banyagihuru zirimo n’izavugaga nabi umukuru w’igihugu cy’u Rwanda.

Tom Ndahiro yasabye kutihanganira abagoreka amateka y’u Rwanda

Umushakashatsi Tom Ndahiro watanze ikiganiro ku guhangana n’abahakana bakanapfobya Jenoside yakorewe Abatutsi mu Rwanda, yasabye abarezi mu mashuri makuru na za kaminuza byo mu karere k’ibiyaga bigari kugira uruhare mu kurwanya ipfobya.

Tom wabanje kugaragariza aba barezi uruhare rwa bimwe mu bihugu byafashije Leta yateguye Jenoside bikaba bigikomeje kugoreka amateka, yagize ati “…Icyo nifuza kubumvisha no kubasaba ni ukutaba bamwe muri aba bakomeje kwihanganira ibi bitihanganirwa.”

Iyi nama y’iminsi ibiri ibaye ku nshuro yayo ya munani yitabiriwe n’abashakashatsi, abarezi n’abarimu bo muri za kaminuza zo mu bihugu bigize akarere k’Afurika y’Uburasirazuba, ikaba izibanda ku ruhare rw’ubuyobozi mu gukumira Jenoside.

Martin NIYONKURU
UM– USEKE.RW