Igikorwa cyo gutora MissRwanda cyashyizwe ku isoko

Mu mwaka wa 2009 nibwo mu Rwanda igikorwa cyo gutora Nyampinga w’u Rwanda cyatangiye kumvwa ndetse kimenywa n’abantu batari bake. Kuri ubu icyo gikorwa cyamaze gushyirwa ku isoko kuri rwiyemezamirimo wumva afite icyo yarusha abandi.

Ubusanzwe iryo soko ryari risanganywe na Rwanda Inspiration Back Up guhera mu mwaka wa 2014. Ubu iyo company nayo ikaba igomba guhatanira iryo soko bwa kabiri ikaryegukana cyangwa se bakariha undi.

Amakuru agera ku Umuseke, avuga ko icyo gikorwa ubu kiri mu maboko ya RALC ‘Inteko nyarwanda y’ururimi n’umuco’ ikora nk’umufatanyabikorwa wa Minispoc inafite mu nshingano zayo itegurwa n’imigendekere y’igikorwa cya MissRwanda.

Kagame Ishimwe Dieudonne umuyobozi wa Rwanda Inspiration Back Up yari isanganywe iryo soko, yabwiye Umuseke ko amasezerano yari afitenye na Minispoc yo gutegura icyo gikorwa ubu kiri muri RALC yarangiye. Agomba gupiganirwa bushya.

Ati “Imyaka itatu nari maranye iri soko hari ibyo abanyarwanda babona byagiye biba byiza cyangwa se bibi ugereranyije n’igihe iki gikorwa cyatangiriye kuvugwa mu mwaka wa 2009. Mu gihe cyaba cyaragenze neza ubwo nzarisubirana. Ariko mu gihe nanone bazasanga byarakozwe nabi nzaryakwa”.

Uko imyaka yagendaga ishira ni nako iki gikorwa cyagenda gihindura isura mu buryo bw’imitegurire ndetse n’ibihembo ku mukobwa wegukana iri rushanwa. Ibi bikaba bishobora guha amahirwe Rwanda Inspiration Back Up yo kurigumana.

Bwa mbere iki gikorwa gitangira mu mwaka wa 2009 ikamba rikegukanwa na Bahati Grace wari uhagarariye Intara y’Amajyepfo, niwe wabonye igihembo cy’imodoka naho ibisonga ntihagira igihembo bibona.

Mu mwaka wa 2012 ubwo iryo kamba ryahabwaga Mutesi Kayibanda Aurore wanarigumanye umwaka wa 2013, nawe yahawe imodoka ariko ibisonga bye bihambwa imiheha ya fanta.

Nyuma y’icyo gihe nibwo Rwanda Inspiration Back Up yafashe iryo soko guhera muri 2014 ari nabwo Akiwacu Colombe yahembwaga imodoka anahabwa miliyoni ebyeri ‘2.000.000 frw’ z’amafaranga y’u Rwanda.

Guhera icyo gihe nibwo ibihembo byaje gutangira guhinduka kuri nyampinga aho yahembwaga imodoka agahita anagirana amasezerano na Cogebank yo kujya imuha umushahara wa 800.000 frw buri kwezi.

Ibyo bikaba byaratangiriye kuri Kundwa Doriane wabaye nyampinga w’u Rwanda 2015 ndetse na Mutesi Jolly ufite iryo kamba mu mwaka wa 2016.

Joel Rutaganda

UM– USEKE.RW