Basketball: Espoir BBC yatsinze Patriots yisubiza igikombe cyo kwibuka
Espoir BBC bishimira igikombe.
Irushanwa ryo kwibuka abari abakinyi, abayobozi n’abakunzi b’umukino wa Basketball bazize Jenoside yakorewe Abatutsi ryiswe ‘Genocide memorial tournament’ ryegukanywe na Espoir BBC itsinze Patriots BBC amanota 69-56.
Irushanwa ryo kwibuka abazize Jenoside yakorewe abatutsi 1994, bahoze mu mukino wa Basketball, ryasojwe n’umukino uhuza amakipe ahora ahanganye mu mukino wa Basketball mu Rwanda. Espoir BBC itozwa na John Bahufite ishobora kuyobora umukino kugera urangiye.
Espoir BBC ibifashijwemo n’umu-Meneur w’umurundi bongeye mo muri iri rushanwa (utarakinnye Shampiyona) Hakizimana Jean, yinjiye mu mukino mbere ya Patriots BBC, ku buryo yatsinze amanota 14 Patriots itarashobora kwinjiza mu gakangara (panier) na rimwe.
Abasore ba Espoir BBC nka Hakizimana Lionel, Ngandu Bienvenue, Patrick Buzangu, Shyaka Olivier na Hakizimana Jean, bakomezaga gukina neza, bituma abakinnyi ba Patriots BBC nka Ally Kazingufu na Mugabe Aristide batigaragaza muri uyu mukino.
Espoir BBC yashoboye gutwara igikombe cyo kwibuka mu bagabo itsinze Patriots BBC amanota 69-56. Naho mu bagore, gitwarwa na APR BBC itsinze ‘The Hoops 63-50’.
Iki gikombe cyahuje amakipe y’imbere mu gihugu hagamijwe kwibuka bazize Jonoside yakorewe abatutsi 1994, bahoze mu muryango wa Basketball, kizakurikirwa n’irushanwa mpuzamahanga ryo kwibuka Ntarugera Emmanuel bitaga Gisembe.
Memorial Gisembe izatangira tariki ya 17 kugera 19 Kamena 2016. Amakipe atanu mu bagabo, n’amakipe atatu mu bagore, niyo azitabira iri rushanwa aturutse hanze.
Aha, amakipe y’abagabo azitabira iri rushanwa ni PJB – Goma, Boundess Bukavu, Goma Bulls na Ami BK zo muri Repubulika Iharanira Demokarasi ya Congo, ndetse na Dynamo yo mu Burundi. Aziyongera kuri Espoir BBC, Patriots BBC, na IPRC Kigali (zaje imbere muri Genocide memorial tournament), bakore irushanwa ry’amakipe umunani. Umwaka ushize 2015, Memorial Gisembe yatwawe na Espoir BBC.
Mu bagore, iri rushaanwa rizakinwa na Scandinavia BBC, PJB Goma zo muri Repubulika Iharanira Demokarasi ya Congo na Berco Stars yo mu Burundi, ziziyongera kuri APR BBC (yegukanye Genocide memorial tournament), bakore irushanwa ry’amakipe ane.
Roben NGABO
UM– USEKE.RW
English