Active yasubiranye na Bernard muri ‘Incredible Records’

Amakuru agera ku Umuseke, avuga ko itsinda rya Active ryamaze gusubirana na Producer Bernard ukorera muri Incredible Records nyuma y’imyaka ibiri bahagaritse gukorana bakerekeza muri Infinity.

Ibi nanone byaje gusobanurwa na Mugiraneza Thierry cyangwa Tizzo wemeje ko bamaze gusubirana na Bernard ariko hari igice ashinzwe gukora n’ikindi kigomba gukomeza gukorwa n’ubuyobozi bwa Infinity bafitanye amasezerano.

Mu mwaka wa 2013 nibwo itsinda rya Active ryishyize hamwe ku nama ya Bernard. Mbere yahoo buri umwe akaba yarakoraga muzika ku giti cye.

Bityo biza no gutuma muri uwo mwaka bitabira irushanwa rya Primus Guma Guma Super Star4 ku nshuro yabo ya mbere ndetse baza no kuza ku mwanya wa gatandatu mu bahanzi 10 bari muri iryo rushanwa.

Tizzo yakomeje abwira Umuseke ko gusubirana na Bernard atari iyindi mpamvu. Ari uko ariwe uzi neza ibyo biyumvamo igihe barimo kwandika cyangwa barimo gufata amajwi y’indirimbo.

Ati “Ubu twasubiye muri Incredible. Ariko ntabwo tuzakorana na Bernard nk’umujyanama mukuru wacu. Oyaaaa!!ahubwo azajya adukorera nka Producer wacu ibindi birareba Infinity”.

Abajijwe niba bitaba uburyo bwo kuyobya uburari itangazamakuru basubiranye hakoreshejwe amasezerano nk’umujyanama wabo, yavuze ko atariko bimeze.

Mu ntangiriro z’umwaka wa 2016 nibwo umuraperi Bulldogg yasezeye muri iyo label. Ahanini ngo bikaba byaratewe nuko hari ibyo batabashije kumvikana nawe mu buryo bw’imyinjirize.

Nyuma y’aho amaze kugenda nibwo hinjijwemo Yvan Buravani umwe mu bahanzi barimo kuzamuka cyane kubera indirimbo arimo gukora zikunzwe n’abantu benshi zirimo iyo aherutse gukorana na Uncle Austin bise ‘Urwo nkukunda’.

https://www.youtube.com/watch?v=IlmvLIEfgCM

Joel Rutaganda

UM– USEKE.RW