Platini niwe wabwiye Safi ko Knowless yambitswe impeta

Kuba Knowless yarambitswe impeta binavugwa ko ubukwe bwegereje, biri muri zimwe mu nkuru zavuzweho cyane mu byumweru bigera kuri bibiri bishize. Iyo nkuru ngo Safi ntabwo yari yakayisomye ahubwo yahamagawe na Platini wo muri Dream Boys amubaza ko hari icyo yamenye.

Icyo gihe inkuru icicikana mu bitangazamakuru bitandukanye, Safi yari yibereye mu ifatwa ry’amashusho y’indirimbo ihuriwemwo n’abahanzi 10 bari mu irushanwa rya Primus Guma Guma Super Star6.

Agiye kubona abona telephone ya Platini iramuhamagaye gusa ngo yibazaga ko ari ibindi bintu bisanzwe agiye kumubwira nk’inshuti zisanganywe. Agiye kumva ngo “Wamenye ibyabaye?Umwana baramujyanye ku mugaragaro”.

Kuri Safi avuga ko atigeze abitindaho cyane gusa nabyo bitabuze nk’umuntu bakundanyeho imyaka igera kuri itatu yose bizwi ahantu hose nyuma bakaza gutandukana ari nabwo Knowless yahise akundana na Clement.

Mu kiganiro yagiranye na Radio 10, Safi Madiba wo mu itsinda rya Urban Boys, yavuze ko yifuriza Knowless amahirwe mu rugendo rushya yatangiranye na Clement. Ndetse ko yifuza kuzakomeza kumubona nka Knowless uzwi mu muziki atazibwa intege n’urugo.

Ati “Yego rwose natandukanye na Knowless. Ariko mu gutandukana kwacu ntabwo twigeze tuba abanzi ahubwo twabaye inshuti zisanzwe. Sinamwifuriza ikibi nkuko nawe nibaza ko ntacyo yanyifuriza”.

Safi na Knowless ni couple yavuzwe igihe kirekire cyane mu itangazamakuru ryo mu Rwanda mu rukundo rwabo. Aho batandukaniye baza gukora indirimbo nanone nyinshi umwe abwira undi icyo amutekerezaho  gusa mu buryo bwa gihanzi bazimiza.

Nyuma y’imyaka itanu yose Knowless akundana na Clement mu buryo bwagizwe ibanga cyane, byaje kuba ngombwa ko babishyira hanze ndetse n’igihe cy’ubukwe bwabo kiramenyekana.

Amakuru agera ku Umuseke, avuga ko ubukwe bwa Knowless na Clement buzabana muri Kamena 2016 kuri Gorden Tulip i Nyamata. Ariko nta tariki runaka izwi ahubwo biracyari ibanga rikomeye.

https://www.youtube.com/watch?v=kvwsseYyDl8

Joel Rutaganda

UM– USEKE.RW