Irene Mercy avuga ko abaririmbira Imana badakwiye guharanira kwamamara

Uyu muhanzi umaze igihe kirekire mu byo kuririmbira Imana asaba abahanzi bagenzi babikora ko umuhanzi w’indirimbo z’Imana by’ukuri atagomba guharanira kuba icyamamare n’umukire ahubwo agomba guharanira ko ubutumwa atambutsa buba busingiza Yesu/zu na Se wo  mu Ijuru.

Kuri we ngo umuhanzi wa ‘Gospel’ nta kindi akwiye kwamamaza uretse urukundo Imana yakunze abantu ikemera kuboherereza umwana wayo akaza kubacungura ngo bazabone ubuzima buhoraho.

Mercy avuga ko abahanzi baririmbira Imana batagomba guharanira kuzuza abafana inzu z’imyidagaduro ahubwo bakwiye guharanira gutanga ubutumwa bw’urukundo kurusha ibyo bindi.

Irene Mercy ati “ Kugira abakunzi benshi ni byiza, gutegura ibitaramo bikagenda neza nabyo ni byiza cyane , ariko nanone tujye twibuka intego nyamukuru yazanye Yesu Kristo ku isi ariyo gukura abantu mu byaha, ibyo nibyo bikwiye kuza mbere y’ibindi ku muhanzi wa Gospel.”

Uyu muhanzi kandi yemeza ko abitabira ibitaramo by’abahanzi b’indirimbo zihimbaza Imana bose atari ko baba bayikorera mu buryo yemera,  ko umurimo w’abahanzi uba ari ugutuma uwajemo ataricuza yahava yicujije agahinduka kuko ubwo buba aribwo buryo abonye.

Yashoje aha abahanzi bakora indirimbo zihimbaza Imana ubutumwa bashingiye kuri Bibiliya muri Mariko 16:15-16 bugira buti: “Mujye mu bihugu byose, mwigishe abaremwe bose ubutumwa bwiza. Uwizera akabatizwa azakizwa ,ariko utizera azacirwaho iteka.”

Daddy SADIKI RUBANGURA
UM– USEKE.RW