Knowless na Active mu gitaramo kiswe ‘Connect Party’

Bwa mbere mu Rwanda hateguwe igitaramo kigiye guhuririmo ibyamamare bikunzwe cyane mu Rwanda muri buri kiciro. Knowless ndetse n’itsinda rya Active akaba aribo bazasusurutsa abazitabira icyo gitaramo.

Icyo gitaramo kizitabirwa n’ Abahanzi, Abakinnyi b’umupira w’amaguru, Abakinnyi ba filme, Abanyamakuru, n’abayobozi b’ibigo bimaze kumenyekana cyane mu gutera inkunga ibijyanye n’umuziki w’u Rwanda ndetse n’indi myidagaduro muri rusange.

Sandra Teta umaze igihe ategura ibitaramo bikomeye bibera mu Rwanda bigahurirwamo n’ibyamamare bitandukanye, avuga ko iyi nshuro yatekereje kuri buri muntu wese ufite aho ahurira n’imyidagaduro. Bityo umaze igihe izina rye rikunzwe mu banyarwanda akazahembwa.

Mu kiganiro yagiranye na Umuseke, Sandra avuga ko iyi nshuro ari iya mbere hateguwe igitaramo gifata kuri buri muntu wese ufite aho ahurira n’imyidagaduro. Ko ateganya kuzakora ikindi kisumbuyeho ubutaha.

Ati “Njye na bagenzi banjye twafashe igihe kinini cyane cyo gutekereza kuri iki kintu. Gusa ibyo wifuje byose siko uba uzi neza yuko ushobora kubigeraho mu buryo bworoshye. Nishimira ko igice cya mbere tukigeze ku musozo”.

Yakomeje avuga ko batifuje gutangaza amazina y’abagomba kuzahabwa ibihembo mbere y’igikorwa. Ko buri wese wisanga muri icyo kiciro afite amahirwe angana n’ay’undi yo kuba ariwe uzahabwa ibihembo bizatangwa.

Biteganyijwe ko icyo gitaramo kizaba kuwa 27 Gicurasi 2016 kuri Beirut i Nyarutarama guhera saa kumi n’imwe z’umugoroba (17:00’). Kwinjira kuri buri muntu bikazaba ari amafaranga 5000 frw.

Joel Rutaganda

UM– USEKE.RW