Senderi ntiyifuza guhura n’icyatuma avuga kuri Guma Guma

Senderi International Hit ni umwe mu bahanzi bagiye barangwa no gukora udushya twinshi mu irushanwa rya Primus Guma Guma Super Star mu nshuro zose yaryitabiriye. Kuri ubu ngo ntabwo ashaka kujya yumva abantu bamubaza ibyerekeye iryo rushanwa.

Ibi yabitangaje mu kiganiro yagiranye na Radio 10 avuga ko guhora abivugaho cyangwa agira ibyo asobanura ku bijyanye n’iryo rushanwa ari ukuryamamaza kandi ataririmo.

Mu nshuro esheshatu iri rushanwa rimaze ritangiye kubera mu Rwanda, Senderi amaze kuryitabira inshuro eshatu. Ari nacyo cyatumye ataryitabira kuri iyi nshuro ya gatandatu ririmo kuba.

Yagize ati “Sinkifuza umuntu uwo ariwe wese umbaza ku bijyanye n’irushanwa rya Guma Guma. Kuko kurivugaho cyane ni ukuryamamaza kandi ntaryo ndimo”.

Amabwiriza y’iri rushanwa, yavugaga ko nta muhanzi uheruka kuryitabira inshuro eshatu zikurikirana wemerewe kongera kugaragara mu bahanzi 10 bahatanira kuryegukana.

Iryo bwiriza rikaba ryarasfashe Senderi n’itsinda rya Dream Boys. Benshi babanje kugira ikibazo ku itsinda rya Urban Boys ryemere kujyamo kandi naryo ari ubwa gatatu riryitabiriye.

Ariko nyuma byaje gusobanuka neza ko atari umuhanzi warigiyemo gatatu ahubwo ari umuhanzi umaze kurijyamo gatatu ku nshuro zikurikirana.

Mu gitaramo cya mbere cy’iri rushanwa cyabereye i Gicumbi kuri uyu wa gatandatu, byagaragariye abantu benshi ko nta guhangana gukomeye kuri hagati y’abahanzi baririmo nkuko byabaga bimeze.

Bamwe bavuga ko andi marushanwa wasangagamo abahanzi bafite amazina akomeye benshi. Ku buryo bitapfaga koroha ko umenya ushobora kuzaryegukana.

Bitandukanye cyane n’ubu ko muri iryo rushanwa harimo muke w’abahanzi ubona ko bafite umubare munini w’abafana benshi kurusha abandi. Bityo bikaba byanabaha amahirwe yo kuba baryegukana mu buryo biboroheye.

Joel Rutaganda

UM– USEKE.RW