Dream Boys na Queen Cha batangiye ibitaramo bizenguruka mu Ntara

Ni ibitaramo byiswe Nyega Nyega Concert byateguwe na company yitwa ‘Garosa Entertainment’ igamije kujya yegereza abahanzi abafana babo no kongera gukundisha abantu gutaramana n’abahanzi mu mijyi itandukanye yo mu turere tugize igihugu.

Bwa mbere rero iyo company ifungura imikoranire yayo n’abahanzi batandukanye muri ibyo bikorwa, ikaba  irimo gukorana n’itsinda rya Dream Boys ndetse na Queen Cha.

Uretse kuzazenguka Intara bagenda bataramana n’abafana babo, iyi company ngo irashaka no kujya ifata amashusho y’indirimbo zabo ikajya iyerekana mu bice bitandukanye.

Ari nabwo buryo bavuga ko buzorohera abafana batabasha kureba abo bahanzi kuri za televiosion nabo kuba babona amashusho y’izo ndirimbo zabo.

Gasirabo Roseline uyobora iyo company, avuga ko buri kintu cyose kiza kukigeraho bisaba kugiharanira. Ko kuba yarafashe uwo mwanzuro wo kwegereza abafana abahanzi bakunda abizi neza ko bigoye ariko azabigeraho.

Uretse kuba yaratangiye ibyo bikorwa byo gufasha abahanzi kugera ku bafana, ubusanzwe ni n’umwe mu bakinnyi ba cinema nyarwanda bamaze kugira izina rikomeye.

Yakomeje abwira Umuseke ko icyo gikorwa ari icya mbere yifuza ko cyagira uruhare runini mu mpinduka za muzika nyarwanda. Igihe cyose yabona hari akamaro byagize, ko afite indi gahunda yo kuzajya akora igitaramo kimwe ngaruka mwaka kizajya gihuriramo abahanzi benshi.

Mu bitaramo bibiri bimaze kuba, abo bahanzi bakaba barataramanye n’abafana babo b’i  Huye mu Ntara y’Amajyepfo, ndetse n’i Musanze mu Ntara y’Amajyaruguru.

Joel Rutaganda

UM– USEKE.RW