3 Hills igiye gukora igitaramo cyo kwiyinjiza mu muziki

Hope Irakoze, Jackson Kalimba na Eric Mucyo ni abasore batatu bari basanzwe bazwi mu ruhando rwa muzika nyarwanda buri wese ku giti cye ku bw’umwihariko w’ubuhanga bwabo mu muziki w’umwimerere(Live). Ngo bagiye gutegura igitaramo cyo kubinjiza ku mugaragaro mu muziki.

Ubwo batangazaga ko bamaze kwishyira hamwe nk’itsinda, benshi mu bari basanzwe bakurikirana umuziki wabo bavuze ko u Rwanda rushobora kuba rugiye kubona izindi mbaraga zizatuma umuziki umenyekana mu Karere.

Nyuma y’iminsi mike bashyize hanze indirimbo bari bahuriyemo bise ‘Manyinya’, baje gusa naho bahugira mu bindi bituma wa muvuduko abantu bari bazi ko bagiye kuzana usa n’ugabanuka.

Mu kiganiro na Radio 10, 3 Hills batangaje ko badahugiye mu bindi ahubwo barimo gutegura album yabo bashaka ko ari nayo izabinjiza ku mugaragaro mu muziki w’u Rwanda nk’itsinda kimwe n’andi.

Eric Mucyo yakomeje avuga ko iyo album bashaka gufata umwanya bakayitondera ku buryo buri muntu wese uzaza muri icyo gitaramo hari itandukaniro ry’umuziki wo kuri CD ndetse n’umuziki w’umwimerere azabona.

Nubwo nta gihe runaka yatangaje bazashyirira hanze iyo album, yavuze ko bidashobora kurenga mu mezi Ugushyingo 2016 cyangwa se na mbere yaho bitewe n’aho bazaba bagejeje imyiteguro.

Mu buzima busanzwe, abo bahanzi buri umwe afite ahantu aririmba mu minsi y’ikiruhuko ‘Weekend’. Hope Irakoze aba ari Milles Colline naho Eric Mucyo akaba aririmbira Serena Hotel.

Amakuru agera ku Umuseke, avuga ko umwe muri abi bahanzi witwa Jackson Kalimba ari umwe mu bahanzi bakunzwe cyane muri Uganda aho afite ahantu aririmba buri weekend nawe.

https://www.youtube.com/watch?v=xTXsOWBlpIE

Joel Rutaganda

UM– USEKE.RW