Massamba araha Jules Sentore amahirwe yo kwegukana PGGSS6

Massamba Butera Intore umuhungu wa Sentore Athanase akaba nyirarume wa Jules Sentore, ngo niba irushanwa rya Primus Guma Guma Super Star rizakurikiza amanota y’umuririmbyi wahize abandi rizegukanwa na Jules Sentore.

Kubera ko ngo ahanini ari umwe mu bahanzi bazwiho kugira ijwi ryiza ndetse akaba anazi kuririmba by’umwimerere ari nabyo bizarebwa cyane kuri iyi nshuro.

Massamba avuga ko akurikije imihindukire y’iri rushanwa aho ubu rizagira ibitaramo umunani gusa. Muri ibyo bitaramo  byose uko ari umunani, bitandatu muri byo bazaririmba full live ibindi bibiri bikazaba ari semi live ariho ashingira avuga ko Jules azitwara neza.

Yabwiye Umuseke ko irushanwa rya Primus Guma Guma Super Star6 rikomeye ugereranyije n’andi yabanje. Kuko ngo harimo abahanzi benshi b’abahanga mu miririmbire.

Uretse Jules Sentore urimo guhabwa amahirwe na bamwe mu bakurikirana umuziki, hari abandi bahanzi barimo Bruce Melodie, Umutare Gaby na Christopher bivugwa ko bitazoroha kuba wabaha amanota.

Mu bahanzi bari muri irushanwa rya Primus Guma Guma Super Star uko ari 10, babiri gusa nibo barigiyemo bwa mbere mu gihe abandi ari inshuro yabo ya gatatu.

Muri abo bahanzi akaba ari Umutare Gaby na Allioni bagaragaye ku rutonde rw’abahanzi 10 bakunzwe cyane mu Rwanda bwa mbere mu myaka itandatu ishize iri rushanwa ritangiye.

Joel Rutaganda

UM– USEKE.RW