Ijwi rya Ben Kayiranga ryasibwe mu ndirimbo ya D. Vumbi

Mu minsi ishize nibwo Ben Kayiranga yatangaje ko ahagaritse burundu ibikorwa byose bijyanye no kuririmba cyangwa se byerekeranye n’umuziki muri rusange. Ibi rero byaje gutuma ijwi rye ryari mu ndirimbo yagombaga kujya ahagaragara yakoranye na Danny Vumvi risibwa.

Uko gusibwa kw’iryo jwi si ubushake bwa Danny Vumbi nka nyir’indirimbo, ahubwo Ben Kayiranga ngo niwe wasabye ko aho yari amaze kuririmba havanwamo bityo indirimbo ikaguma ari iya Danny Vumvi wenyine.

Umushinga wo gukorana iyo ndirimbo watangiye mu mpera za 2015 n’amajwi akaba yari yararangije gufatwa hari hasigaye igihe cyo kuyikorera amashusho.

Danny Vumbi yabwiye Umuseke ko iba yaranagiye hanze kera. Uretse ko hagiye habamo kubura umwanya kuri Ben Kayiranga ngo abe yagaruka mu Rwanda hafatwe amashusho yayo. Bityo igihe kiza kugera asezera umuziki kandi itarajya hanze.

Akomeza avuga ko kuba nta jwi rya Ben Kayiranga rizumvikana muri iyo ndirimbo atari ibintu byamushimishije nk’umuhanzi bakoranye yari aziho ubuhanga kandi yahoraga yifuza ko bazakorana indirimbo. Gusa ngo agomba kubahiriza ubusabe.

Bwa mbere Danny Vumbi ari ku rutonde rw’abahanzi bazitabira irushanwa rya Primus Guma Guma Super Star ku nshuro yaryo ya gatandatu. Ibi bikaba binavugwa ko afite amahirwe yo kuzitwara neza kubera zimwe mu ndirimbo ze zikunzwe hirya no hino mu Ntara zitandukanye.

Zimwe mu ndirimbo za Danny Vumbi zatumye amenyekana cyane nyuma yo gutandukana nk’itsinda rya The Brothers, harimo ‘Ni danger, Baragowe, Ni uwacu, Injurugutu, Agatsimbo n’izindi.

https://www.youtube.com/watch?v=7DANgMi_880

Joel Rutaganda

UM– USEKE.RW