Perezida Kagame yakiriye Zhang Dejiang uyoboye Inteko y’Ubushinwa
Nyuma y’Ibiganiro Perezida w’u Rwanda ahana ikiganza na Zhang Dejiang Perezida w’Inteko Nshinga Mategeko y’u Bushinwa
Kuri uyu wa gatatu ya saa tanu Zang Dejiang uyobora Inteko Ishinga Amategeko y’Ubushinwa uri mu ruzinduko rw’akazi rw’iminsi ibiri mu Rwanda yaganiriye na Perezida wa Repubulika y’u Rwanda Paul Kagame muri Village Urugwiro ku Kacyiru, ibiganiro byibanze ku ngingo ebyiri zigenza uyu mugabo mu Rwanda.
Zhang Dejiang ni Umuyobozi wa gatatu ukomeye mu Bushinwa, nyuma ya Perezida w’Igihugu n’Umuyobozi w’Akanama k’igihugu (The Premier of State Council). Ni na we ukomeye cyane, usuye u Rwanda kuva umubano w’ibihugu byombi watangira mu 1971.
Nk’umuyobozi wo ku rwego rwo hejuru cyane yakiriwe na Perezida wa Repubulika Paul Kagame mu buryo ubona bukomeye, yari kumwe kandi na ba Minisitiri w’Ububanyi n’Amahanga, Louise Mushikiwabo, Amb Claver Gatete w’Imari n’Igenamigambi, Minisitiri w’Ibikorwa remezo Musoni James, Francois Ngarambe umunyamabanga mukuru w’ishyaka FPR-Inkotanyi na Hon Mukabalisa Donathile Perezida w’Inteko Nshingamategeko umutwe w’Abadepite.
Zang Dejiang we yari kumwe n’abagabo b’Abashinwa b’abanyacyubahiro bagera ku 10 mu itsinda ry’abantu 50 bari kumwe mu rugendo rwe arimo mu bihugu bya Zambia, u Rwanda na Kenya.
Ibiganiro hagati ya Zhang Dejiang na Perezida Kagame byabaye mu muhezo w’itangazamakuru, nyuma Minisitiri Mushikiwabo yatangaje ibyo byibanzeho.
Louise Mushikiwabo Minisitiri w’ububanyi n’amahanga w’u Rwanda yatangaje ko uruzinduko rw’uyu muyobozi rwari rufite impamvu ebyiri; gukomeza umubano mwiza usanzweho hagati y’ibihugu byombi harimo ubufatanye mu bibazo bireba isi, hamwe no gukurikirana ibyakozwe nyuma ya China-Africa Summit yabereye i Johannesburg mu Ukuboza umwaka ushize, aho Perezida Xi Jinping yatangaje umugambi w’ubufatanye bw’agaciro ka miliyoni 60$ mu myaka itatu iri imbere.
Mu 2011 Minisitiri w’abubanyi n’amahanga w’Ubushinwa Yang Jiechi na Visi Minisitiri w’ububanyi n’amahanga ushinze Africa, Zhai Jun basuye u Rwanda bari kumwe.
Mu 2012, muri Mutarama, Li Yuanchao wo muri Biro Politiki y’Ishyaka rya gikomisite ry’Ubushinwa, n’itsinda ry’abantu 22 bari kumwe harimo na ba Visi Minisitiri batatu basuye u Rwanda.
Umwaka ushize, Minisitiri w’ububanyi n’amahanga w’u Rwanda Louise Mushikiwabo nawe yasuye Ubushinwa ndetse anabonana na Perezida w’iki gihugu Xi Jinping.
Photos/Village Urugwiro & A E Hatangimana/Umuseke
Ange Eric HATANGIMANA
UM– USEKE.RW
English