Abatuye mu bishanga nta byangombwa bahabwa kuko ibishanga ari ibya Leta- Min Biruta

Kuri uyu wa Kane ubwo yasubizaga ibibazo Komisiyo y’Abadepite ishinzwe uburenganzira bwa muntu no kurwanya Jenoside yagejejweho n’abatuye Akarere ka Burera, Minisitiri w’umutungo kamere, Dr Vincent Biruta yasobanuye ko bamwe mu baturage batanze biriya bibazo bijyanye no kudahabwa ibyemezo by’ubutaka kandi batuye mu bishanga, ngo ntibari babikwiriye kuko ibishanga ari umutungo wa Leta.

Abaturage batuye mu gishanga cya Rugezi muri Burera nibo bagaragarije iriya Komisiyo ibibazo byabo.

Bimwe mu bibazo abaturage bo mu karere ka Burera bagejeje kuri Komisiyo y’uburenganzira bwa muntu harimo ko abafite imitungo itimukanwa muri kiriya gishanga nk’imirima batemewe kuyihingamo cyangwa ngo bakoreremo igikorwa runaka kirambye kuko ngo ubutaka buri cyangwa bwegereye igishanga budatangirwa icyangombwa kuko aba ari umutungo wa Leta.

Dr Vincent Biruta yabwiye abadepite ko abaturage 39 babashije kwimuka bakava mu bishanga cyangwa mu nkengero zabyo bahawe ibyangombwa ariko ngo hasigaye babiri batarakurikiza ibisabwa n’amategeko agenga ubutaka.

Aba babiri basigaye ngo hari gukorwa ibishoboka ngo bahabwe ibyangombwa by’ubutaka ariko bamaze kuzuza ibisabwa.

Ubutaka bw’igishanga cya Rugezi bufite ubuso bwa Hegitali 8.19, ariko abaturage bakaba bari baratangiye kubakamo amazu no kubukoramo ibikorwa by’ubuhinzi mu buryo bwangiza ibidukikije kandi bugashyira ubuzima bw’abantu mu kaga.

Dr Biruta yagize ati “Abaturage bazahinga muri kiriya gishanga ariko ntibaturemo tuzabareka bahinge kandi tuzabafasha kwibumbira muri za Koperative kugira ngo bahabwe ibyangombwa mu buryo buzatuma bakorera hamwe bakunguka .”

Yavuze ko bazakorana na Minisiteri y’ubuhinzi bakareba uko bariya baturage bahabwa ibyangombwa.
Dr Biruta yabwiye abadepite ko ubuyobozi bw’Akarere ka Burera bugomba gufata iya mbere bugashaka aho bwatuza abaturage bake bakiri muri kiriya gishanga.

Muri ibi bihe bigaragaramo imvura nyinshi, abatuye mu manegeka cyangwa bafite ibikorwa mu bishanga, basabwa kuhimuka mu rwego rwo kwirinda akaga kazaterwa n’ibiza bikomoka ku mvura.

Josiane UWANYIRIGIRA

UM– USEKE.RW