Rayon Sports itsinze Amagaju FC, yaza ku mwanya wa mbere wa Shampiyona

Nyuma yo gusubikwa kubera imvura nyinshi yaguye i Nyamagabe kuwa gatatu tariki 8 Werurwe 2016, uyu mukino hagati y’amakipe ya Rayon Sports na Amajagu FC urakinwa kuri uyu wa Gatanu ubere kuri Stade Nyamagabe.

Masudi Djuma utoza Rayon Sports yatangarije Umuseke ko gutsinda uyu mukino ari byo biza kwemeza ko Rayon Sports ifite amahirwe menshi yo gutwara igikombe, kandi ngo hari ikizere.

Yagize ati: “Twiteguye bijyanye n’ikibuga turakiriraho. Ni ikibuga kigoranye cyane iyo uhanganye n’Amagaju ahamenyereye. Gusa iki cyumweru twitoreje ku kibuga kibi. Niyo mpamvu dufite ikizere cyo gutahana intsinzi. Kuba nta mvune dufite byongera ikizere ko twatsinda Amagaju nubwo turi bukinire ku kibuga tutamenyereye.”

Masudi yatangaje ibi kuri uyu wa kane, mbere yo kuva i Kigali bajya mu mwiherero i Huye.
Bizimana Abdul bita Bekeni utoza Amagaju FC, we atangaza ko guhura na Rayon Sports ari umukino umugora cyane, mu kibuga, ndetse no gutegura abakinnyi be mu mutwe.

Bekeni ati: “Turashaka amanota yose muri uyu mukino, kuko yadufasha kuzamuka ku rutonde rwa Shampiyona. Ariko iyo ukina n’amakipe akomeye nka Rayon sports bisaba gutegura cyane abakinnyi banjye k’uburyo baza gukina. Uyu ni umukino witabirwa n’abafana benshi. Ariko dufite amahirwe kurusha Rayon kuko turi mu rugo.”

Mu mukino uheruka tariki ya 13 Werurwe 2016 kuri Stade ya Kigali i Nyamirambo, Rayon Sports yatsinze Musanze FC ibitego 3-0.

Ku rutonde rw’agateganyo rwa Shampiyona, Rayon Sports iri ku mwanya wa 3 n’amanota 29, mu gihe Amagaju FC ari ku mwanya wa 10 n’amanota 18.

Ikipe ya mbere muri Shampiyona ni Mukura Victory Sports n’amanota 32 mu gihe ku mwanya wa nyuma haza AS Muhanga n’amanota 4.

Roben NGABO

UM– USEKE.RW